Меню
16+

Сетевое издание «Бабаюртовские вести»

23.02.2021 11:46 Вторник
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Къоччакъ улан Тавболат

Автор: Гёзел Гьасанова

Афгъанистан… Шо уьлкени атын эшитгенде, юрегингни терениндеги тамурлар бир тамаша жымырлап гете, неге тюгюл 80-нчи йылларда бизин совет уланланы кёплери онда жанларын къурбан этгенлер.

Сав къалып къайтгъанлары ёлдашларын гьар гюн дегенлей эсгере, онда душманлар булан юрютген къагьрулу давланы унутуп болмайлар.

Шо йыллларда афгъан давгъа бизин республикадан да кёп жагьиллер йиберилген. Шоланы арасында, давну отунда авур яраланса да, намуслу кюйде асгер борчун кютген Тавболат Алавдинович Гьажиев де бар.

Тавболат Гьажиев 1962-нчи йылда 25-нчи мартда Чонтавулда тувгъан. Ону яш йыллары Байрамавулда оьтген. 1969-1980-нчи йылларда Байрамавулдагъы орта школаны битдирген сонг, гёнгюллю кюйде военкоматгъа барып, шофёр курслагъа охумагъа йибермекни тилеп арза язгъан. Курсланы битдирип, асгер борчун кютмеге гетген. Буланы башлап Волгоград шагьаргъа элтген. Эки жума онда тургъан сонг, 150 уланны Афганистангъа йибергенлер. Шоланы арасында Таболат Гьажиев де болгъан.

Жап-жагьил, он сегиз йыл болагъан, къолуна бир керен де дав савут тутмагъан Тавболат Гьажиев, шо гючлю давда гёрген къыйынлыкъларын гёз алдан тайдырып болмай. Ону аркъасында къалгъан яркъыч да шону унутмагъа къоймай.

Т.Гьажиев афгъан давну гьакъында эсгере туруп, булай деди:

-Бизин дивизия бешинчи точкадагъы ёлну сакълай эди. Шофёр курсланы битген саялы, мени сув бочке тагъылгъан машинге олтуртдулар Сувну бираз йыракъдан ташымагъа тюше эди, неге тюгюл ювукъ арадагъы сувланы душманлар агъулама болагъандан къоркъуп, бизге ондан сув алмагъа къоймай эди.

Бир гюн ёлдашым да булан сув алмагъа гетдим. Ондан къайтып гелегенде, атышыв башланды. Машинни артындагъы бочкени дёгерчиги юлкъунду, мен эки ерден яраландым. Шогъар да къарамайлы, машинни токътатмайлы, он беш чакъырым гьайдап, бизинкилени янына етишип токътадым. Мени тезлик булан госпиталгъа йибердилер. Шо ишим саялы магъа «Игитлиги учун» деген медал тапшурулду.

Бирдагъы бир дав агьвалатны гьакъында эсгермеге сюемен. 1983- нчю йылда Партияны ортакъчыларына карточкалар тапшурула эди. Магъа шолай карточканы артындан башгъа шагьаргъа бармагъа тюшдю. Командир мени де ва шо карточкаланы алмагъа герек оьзге яшланы да алып, ёлгъа тюшдю. Бираз ёл оьтген сонг, душманлар гранотометдан атышып башладылар. Командирибиз еринде оьлдю, мен буса авур яраландым. Нечакъы яралансам да, шо ерде командованияны башыма алып, атышма буйрукъ бердим. Шо вакътиде душманлар гранатомёт булан бирдагъы атышып, бизин якъ-якъгъа чачдылар. Ювукъ арадан оьтюп барагъан бизин танклар кёмекге алгъасадылар. Тек бизин гючюбюз олардан эсе бир-нече керенге аз эди. Арт да мен гьавадан кёмек тиледим. Тилегим гери урулду, амма биз гёрсетген ерге «Градлар» ишледи. Шондан сонг душманлардан къутулмагъа бажарылды.

Мен авур яралангъангъа гёре, тезлик булан госпиталгъа йибердилер. Шонда бир ай ятып чыкъдым. Сонг командир чакъырып: «Сени он беш гюнге уьйге йибере, барамысан?» -- деп сорады. Мен ойлашып къарайым дедим. Шо заман командир магъа: «Сени орнунгда болгъан бусам, бармажакъ эдим», — деди. Мен тамаша болуп къарадым. Ону англап, неге бармажагъын айтды:

«Сен гьали уьйге бу кюйде яралар булан барып, он беш гюнден къайтып гелмеге тюшгенде, ата-анангны юрегине не гьал тюшежек, олар недеп ойлашажакъ. Шо саялы сен шу гьалынгда шолагъа гёрюнмей турсанг яхшы», — деди. Мен де бармадым.

Шо авур яралардан сонг, мени дагъы давну отуна йибермедилер. Магъа командирни орунбасары болмакъны таклиф этди.

- Сизин булан бирге давда болгъан дагъыстанлы уланланы къайсын эсгермеге боласыз?

– Мени булан бирге Леваша райондагъы Насгент юртдан гелген Омар Агларханов деген бек къоччакъ улан бар эди. Биз гьар заман бирче бола эдик. Бир йылдан сонг ону Союзгъа йиберип къойдулар. Шондан сонг бизге дагъы ёлукъмагъа насип болмады. Мен ону гьали де излеймен, тек тапма болмайман.

Асгер борчун игит кюйде кютюп, Тавболат Гьажиев 1983-нчю йылда ата юртуна къайтгъан ва Байрамвулдагъы колхозда тракторист болуп ишлеген.

Тавболат Гьажиев гёрсетген игитлиги унутулмагъан, 1984-нчю йылда Хасавюрт военкоматда огъар «Игитлиги учун» деген экинчи медал тапшурулгъан.

1987-нчи йылда Тавболат Гьажиев Москва болгъан комсомолну XX-нчы Съездинде ортакъчылыкъ этген ва онда Тавболатгъа болажакъ олжасына ёлукъмагъа насип болгъан.

Обкомну таклифине гёре, Т.Гьажиев Ростовдагъы Партия школасына охумагъа йиберилген ва огъар «Политолог» деген диплом тапшурулгъан. Тавболат Гьажиев уьч йылныузагъында Ростовдагъызаводда ишлеген.

Къысматны ёллары къыйын экенге гёре, яшав гьаллар Т.Гьажиевни Дагъыстангъа къайтмагъа ва Герменчикде яшамагъа борчлу этген. Ол уьч йыл Бабаюртдагъы Дзержинскийни атындагъы ПМК-да, он йыл Нарыш къотанда тракторист болуп загьмат тёкген.

Аркъасында яркъыч да булан онча йыллар ишлемеге тынч болмагъан. Артда да Тавболатны савлугъу бираз осаллашгъанда, ол инвалид пенсиягъа чыкъгъан.

Оьзюню агьлюсю булан бирге Тавболат Гьажиев кёп къыйынлыкълардан оьтсе де, бугюнге бек насиплияшайлар. Оларуьч къызны, эки уланны тарбиялагъанлар ва тюз ёллагъа салгъанлар. Биз Тавболат Гьажиевге гьакъ юрекден савлукъ ва узакъ оьмюр ёрайбыз. Ватаны учун этген къоччакълыгъы саялы баракалла айтма сюебиз

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

13