Тылда къурч загьматы булан Уллу Уьстюнлюкню гюнюн ювукълашдыргъан

Давну къара къанаты тиймеген, давну акъубаларын чекмеген бизин пачалыкъда бир агьлюде, бир ожакъда къалмагъан. Къара булут ябып, элине яв болуп душман чапгъанда, эренлер гёнгюллю кюйде фронтгъа гетген.

Дав майданларда олар немис фащистлеге къаршы ябушувда игитлигин ва къоччакълыгъын гёрсетип, Ватаныны азатлыгъы учун жанын къурбан этгенлер.

Давда къоччакъ кюйде эренлер дав этегенде, уьйде къалгъан оланы аналары, олжалары, къызардашлары, къызлары ятып турмагъан. Олар да игитлигин ва къоччакълыгъын заводдагъы станокланы алдында, авлакъларда гёрсетген.

Тылда къалгъанлагъа да тынч болмагъан. Къарт — яш, къатын — къыз да Уллу Уьстюнлюкню гюнюн ювукълашдырмакъ учун гючюн ва гьаракатын салып чалышгъан. Шагьардагъылар фабрик ва заводларда, юртлулар совхозларда ва колхозларда гечесин гюнюн бир этип тер тёкген. Къурсагъы ашдан тоймаса да, уьстюнде гёрмекли опурагъы — гийими болмаса да, фронт учун олар яллыкъсыз, оьзлени аямай загьмат тёкген.

Уллу Ватан давну ортакъчыларыны атлары булан янаша, тылда фронт учун загьмат тёкгенлени де атлары да макътавгъа ва сыйгъа лайыкълы.

Бизин районда да къурч загьматы булан тылда ишлегенлени ал сыдраларында тамазатёбели къатын — къызлар да болгъан.

Бу гезик оланы гьакъында айтма тийишли гёремен.

Олар бизин арабызда ёкъ бусада, къой, оланы атларын оьсюп гелеген яш наслу да билсин ва оьктем болсун.

Тамазатёбедеги клубну ёлбашчысы Ажабике Къазимагьамматова тылны загьматчыларыны атларын язып, безендирип, уллу стенд этген. Онда Уллу Ватан давну йылларында тылда загьмат тёкген 45 къатын — къызны аты язылгъан. Шо къагьрулу дав йылларда оланы бирлери орта чагъында, бирлери янгы агьлю къургъан гелинлер, бирлери жагьил чагъындагъы къызъяшлар болгъан.

Салигьат Гьюсейнова, Дайгьанат Мусаева, Забия Алыпкъачева, Гьалима Гереева, Рабият Умалатова, Салив Къойбагъарова, Айханум Абдурашитова, Гьабийбат Арсланалиева, Сакинат Къазбекова, Арив Сабанчиева, Сапият Алиева, Вагьидат Гьажимагьамматова, Къызув Атаева, Патимат Давуталиева, Муслимат Кумакова, Жавгьарат Вагьабова.

Дав йылларда олар оьзлени аямай, яллыкъ билмей, гечесин — гюнюн бир этип, авлакъларда ашлыкъ къайтарып, пачалыкъны беженин мол тюшюмлерден толтургъан. Къатын — къызлар тракторлагъада минген, топуракъда сюрген. Трактолар ёкъ заманда, оьгюзлер, атлар егип ер сюрген, ашлыкъ чачгъан. Биринчилей "темир атны" елегенлерден Хадижат Алишева болгъан. Ондан уьлгю алып тракторлагъа минген о замангъы юртлу къызлар Анаш Атавгьажиева, Рагьимат Манапова, Райгьанат Къадырова.

Шо къагьрулу дав йылларда юртлу къатынлар Хасавюрт шагьаргъа барып, нап ташый болгъан авлакъ ишлеге. Ат арбаланы егип, арбачы къатынлар Татув Салаватова, Уркъуят Имангьажиева, Райгьанат Салимсолтанова, Кабират Юнусова оюну — масхарасы, сарыны — йыры булан узакъ ёлгъа чыгъа болгъан.

Олар Костекден, Умашавулдан оьтюп, шагъаргъа геле болгъан. Авлакъдагъы ишлер бютюнлей къатын — къызны боюнда болгъан. Аталары, эрлери, эркъардашлары фронтда намарт душман булан дав этегенде, къатын — къызда тылда этек чалып чалышгъан. Фронт учун ашлыкъ болдургъан. Авлакъ ишлер булан да дазуланып къалмай, гезиги гелгенде Мычыгъыш бойлагъа барып, окопларда къазгъанлар.

Юртлу къатын — къыз фронтда дав этеген совет асгер учун чорап, къолбакъ согъуп йибере болгъан. Уллу Уьстюнлюкню гюнюн ювукълашдырмакъ учун бир затында къызманмагъан, уьстюнден чечип алтын — гюмюш безендириклерин де бере болгъан.

Уллу Ватан давда совет солдат гёрсетген къоччакълыкъ ва игитлик нече асрулар гетседе тарихлерде ва бизин эсибизде къалма тарыкъ.

Тылда къурч загьматы булан Уллу Уьстюнлюкню гюнюн ювукълашдыргъан къатын — къызны къошуму ва пайы бар деп ташдырып айтып болабыз, оьсюп гелеген яш наслуда оланы атларын билмеге герек. Бугюнлерде бизин арабызда олар ёкъ бусада, оланы ярыкъ эсделигин сакъламагъа бизин сыйлы борчубуз.