Меню
16+

Сетевое издание «Бабаюртовские вести»

26.11.2021 10:20 Пятница
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!
Выпуск 46 от 26.11.2021 г.

Анамны эсге ала туруп…

Автор: Герейхан Аджиев

Етип гелеген къаттыгюн, 28-нчи ноябрде Россияда Аналаны гюню белгилене. Шо гюн авлетлери аналарын байрам булан къутлап, оланы гёнгюн алмагъа къаражакълар. Амма шо гюн магъа анамны тас этген йылдан тутуп ят болгъан.

Мени анам муаллим эди. Балики, шогъар буса да ярай, муаллим – лап да сыйлы касбуланы бириси деп эсиме геле. Анам ерли школада башлапгъы класланы муаллими болуп ишлегени де себеплидир. Мен ону касбусуна берилгенин, гьар охувчусун оьз яшы йимик сюегенин гёре туруп, ону юреги нечик эркин, нечик ачыкъ экенге кёп керенлер мюкюр болгъанман. Къолумдан тутуп, биринчи гьарпланы, биринчи «Ана», «Ватан» деген сёзлени язмагъа уьйретген де ол эди: анам ва биринчи муаллимим — Женнетхан Абдулхановна.

Озокъда, бугюн къырыйымда ёкъ, амма гьаман да юрегимде сакълайгъан анамны гьакъында язмагъа тынч тюгюл. Ол юрегинде авлетлерине бакъгъан уллу сюювю булан яшавдан яшлайын гетди. Ону авлетлери янгыз биз тюгюл эдик: 35 йылны боюнда муаллимлик касбуну юрютген анабыз, яшавну тайгъакъ сокъмакъларындан оьтюп, алдында уллу шагьра ёлланы ачмагъа кёмек этген 200-ден де артыкъ яшны анасыдай гьисап эте эди. Яшавуну ахырынчы гюнюне етишгенче де ону бары да гьайы оьзю чачгъан урлукъланы оьсювюнде эди.

Женнетхан Гьажиева 1952-нчи йылда 10-нчу мартда Хамаматюртда Уллу Ватан давну ортакъчысы Абдулханны ва Мадинаны агьлюсюнде тувгъан. 1967-нчи йылда Хамаматюртдагъы орта школаны 8 класын битдирип, Хасавюрт шагьардагъы педучилищеге охумагъа тюше. Ону уьстюнлю кюйде тамамлап, оьзюню загьмат ёлун 1971-нчи йыл Туршунайдагъы сегиз йыллыкъ школада башлай.

Башлапгъы школада клас ёлбашчы болуп ишлей. Оьзюне тапшурулгъан класны уьлгюлю кюйде юрюте. Яшланы гьар якъдан билимин артдырмагъа чалыша, охувдан артда къалгъан яшлар булан айрыча иш гёре, оланы ата-аналары булан тыгъыс аралыкъ тута.

Аз заманны ичинде анабыз иш ёлдашларыны ва яшланы ата-аналырыны арасында англав таба, оьсюп гелеген яш наслугъа билим бермек муратда къасткъылып чалыша. Оьзюню къайратлы загьматы булан ол охувчуларыны ата-аналарыны разилигин де къазана.

Яшав шартлагъа бойсынып, анабыз сонггъу йылларда ата юрту Хамаматюртдагъы 2 номерли толмагъан школада загьмат ёлун узата, узакъ къалмай ондагъы орта школагъа чыгъарыла. Мунда да башлапгъы школада клас ёлбашчы болуп ишлей. Оьзюню топлагъан иш сынаву, билими булан яшланы юреклерини ачгъычын табып дегенлей, олагъа гьайлы янашып, сюювюн къазана. Сонг ол 1975-нчи йылдан 2006-нчы йылгъа ерли Адил-Янгыюрт орта школада ишлей. Шо йылланы боюнда ол оьзюню гёзалдында 200-ге ювукъ гиччипавланы язмагъа-бузмагъа уьйретген, гиччиден тутуп юртуна, элине ва халкъына пайдалы болмакъны юрегине сингдирмеге бажаргъан.

Анабыз бир класны оьр класгъа чыгъарып, янгы клас алмагъа заман етгенде, яшын класына алмакъны тилеп, уьюбюзге гелеген ата-аналаны ахыры арты болмагъаны да ону юртлуланы арасындагъы уллу абуру болгъанны исбатлай. Озокъда, бир класгъа бары да яшны жыймагъа бажарылмайгъаны англашыла. Шолай вакътиде анабыз тилек булан гелегенлени гёнгюн бузма сюймей, не айтажагъын билмей де къала эди.

Школада оьтгерилеген гьар тюрлю ярышларда анабызны охувчулары алдынлы ерлерде бола эдилер. Билим якъдан да ону охувчуларына етегенлер де аз эди. Мисал учун айтгъанда, бизин класдан 11 яш школаны къызыл аттестатгъа тамамладылар, шонча яхшы къыйматлагъа охуйгъанлары да бар эди.

Оьсюп гелеген яш наслугъа билим беривде етишген уьсюнлюклери саялы анабыз гьар тюрлю йылларда школа, юрт ва район оьлчевде гьюрметлев грамоталар булан савгъатлангъан, 1989-нчу йылда буса ДАССР-ни Оьр Советини Президиумуну къарарына гёре огъар «ДАССР-ни ат къазангъан муаллими» деген сыйлы ат да берилди.

Буса да, ол оьзюне этилген абур-сый булан бир де макътанмагъан. Гьатта ол шо сыйлы атгъа ес болгъанны билегенлер де аз эди, оьзю де эсгерип турмагъан. Уьягьлю, авлетлери, школа яшаву ва охувчуларыны оьзюне бакъгъан якъдагъы сюювю – муна булар бары да ону учун адынлы ерде токътагъан эди. Савлугъуну гьайын этив, ял алыв да огъар ят эди.

«Мен уьйде къалсам, класымдагъы яшлар яйылып къалажакъ. Шондан къоркъаман», -- деп айтып бола эди ол. Гьатта эмсиз аврув къабунуп, савлугъун тас этгенде де ол билим береген яшларыны гьакъында ойлаша эди, оланы аяй эди. Амма аврув ону оьзюн аямады…

Узакъ аврувдан сонг, 2008-нчи йылны июн айында анабызны гёзлери даимликге ябулду. Арадан йыллар гетген булан да, ону ярыкъ келпети эсибизден бир мюгьлетге де таймай.

Шу сатырланы охуй туруп, балики, бир-биревлени анасын макътап яза деп эсине гелмеклик де бар. Амма мен оьрде де эсгерип гетгеним йимик, ол янгыз мени, агъамны ва беш де къызардашымны анасы тюгюл эди. 35 йылланы боюнда ол яшавгъа гёзюн ачмагъа кёмек этген гьар охувчу ону оьз анасыдай сюйгенни де яхшы билемен ва оланы эсинде ону келпети бир замангъа да таймажакъгъа инанаман.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

79