Загьматны уьлгюлю адамы эди

Басир Къочкъаровну атасы Уллу Ватан давда жанын къурбан этген. Анасы пенсияда чагъына етишгенче колхозда ишлеген.

Ону загьмат чалышыву 1955-нчи йыл август айда башлангъан.

Б.Къочкъаров 1960-нчы йыл КПССни сыдраларына къабул этилген.

Басир Къочкъаров 1955-нчи йыл Хасавюртдагъы муаллимлени гьазирлейген училищени, 1968-нчи йылда буса, загьматдан айырылмагъан кюйде, Дагъыстан юрт хозяйство институтну охуп битдирген.

Б.Къочкъаров 1955-1956-нчы йылларда Мужукъай школада башлапгъы класланы муаллими болуп загьмат тёкген, 1956-нчы йылдан 1959-нчу йылгъа ерли Совет Армияны сыдраларында къуллукъ этген.

1959-1961-нчи йылларда Адил-Янгыюртдагъы орта школада башлапгъы класланы муаллими, 1961-нчи йылдан 1963-нчю йыл болгъанча Адил-Янгыюртдагъы Кировну атындагъы колхозда агроном-бавчу болуп ишлеген. 1963-1964-нчю йылларда Магьач- къалада областьара юрт хозяйство школаны тынглавчусу, 1964-1965-нчи йылларда эсгерилген колхозну агроному, 1965-нчи йылдан 1967-нчи йылгъа ерли колхозну председателини орунбасары, 1967-1969-нчу йылларда колхозну агроному, 1969-нчу йылда совхозну башлапгъы партия къурумуну секретары, сонг 1973-нчю йыл болгъанча юрт хозяйство производство управленияны ёлбашчысы болуп да чалышгъан. 1973–нчю йыл ол Бабаюртдагъы «Дагъыстан» совхозну директору этилип сайлана. Шо къуллукъда Басир Къочкъаров 1977-нчи йыл апрель ай болгъанча ишлей.

1977-1983-нчю йылларда Басир Къырымович «Кировский» совхозну башлапгъы партия къурумуну секретары, 1983-1990- нчы йылларда Хосе Диасны атындагъы колхозну председатели болуп чалыша, 1990-нчы йылдан оьмюрюню ахырынчы гюнлерине ерли ол районну табиатына къарайгъан баш пачалыкъ инспектору болуп ишледи.

Басир Къырымовични агроном касбудан къайры, техникадан да яхшы англаву бар эди. Айрокъда, ашлыкъ къайтарывну вакътисинде бузулгъан комбайнлагъа ва башгъа юрт хозяйство техникагъа ремонт этегенде, механизаторлагъа къошулуп, олагъа кёмеклешип, парткомну секретарыман деп конторда олтуруп турмай, ишчилени, савунчуланы арасында болуп, оланы ишге иштагьландырып, арив масхарасы булан гёнгюн де ала эди.

Ватанны ва халкъны алдындагъы яхшы къуллукълары саялы ол «Гьюр- метлев белгиси» деген орден, «В.И.Ленин тувгъанлы 100 йыл битегенликни гьюрметине» деген юбилей медаль, 1973-нчю йыл 6-нчы декабрьде СССР-ни Оьр Советини Президиумуну Указы булан Загьмат Къызыл байракъ ордени булан савгъатлангъан.

Бугюнлерде арабызда яшап болмаса да, Дагъыстанны жамият-экономикасыны оьсювюне хыйлы къошум этген Басир Къочкъаровну атын юртлулары унутмайлар. Къасумхан ГЬАЖИЕВ Адил-Янгыюрт