Меню
16+

Сетевое издание «Бабаюртовские вести»

03.12.2021 13:24 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Гьар не якъдан да гьюнерли адам

Автор: Гёзел Гьасанова

Адам яшавунда бир тармакъ булан машгъул бола. Бизин арабызда тюрлю-тюрлю яндан гьюнерлилери де ёлукъмай къалмай. Шолайланы бириси — Элмурза Агъаевич Тонаев. Чагъы етмишден оьтсе де, ол жагь деп турагъан, гьар заман къаркъарасын чыныкъдырагъан, спортну ташламайгъан адам, огъар къарап, кёп жагьиллер сукълана.

Э.А.Тонаев 1949-нчу йыл 8-нчи ноябрде Гьасанайда тувгъан. Бешинчи класгъа чыкъгъанда, Бабаюртгъа гёче ва юртдагъы бир номерли орта школада сегизинчи класгъа ерли охуй. Ону тамамлап, Буйнакск шагьардагъы экинчи педагогика училищени физкультура бёлюгюне охумагъа тюше. 1969-нчу йылда Эльмурза асгер къуллугъун кютмеге Совет Армияны сыдраларына чакъырыла ва атышыв полкну физкультура яндан гьазирлев бёлюгюню ёлбашчысы бола.

Элмурза Агъаевич эсгереген кюйде, ол бешинчи класдан берли спортгъа берилген. Физкультура дарсдан береген муаллими Азиз Магьамматович ону енгил атлетикада уллу уьстюнлюклеге етишмеге болар йимик гёрген. Шолай болма да болгъан. Гьар заман школада ва училищеде чабывдан ярышлар да Э.Тонаев ал сыдраларда болуп даим уьст гелген.

Буйнакскийде охуйгъан вакътисинде Элмурза къылыч чабушув булан машгъул болгъан. 1970-нчи йылда ол Дагъыстанны студентлерини арасында оьтгерилеген ярышларында чемпион атгъа ес болгъан. 1972-нчи йылда, училищени тамамлап гелген сонг, Бабаюртдагъы бир номерли орта школада физкультурадан дарс береген муаллим болуп загьмат ёлун башлай. О замандан берли Элмурза Тонаев охувчу яшлардан ГТО-ну нормаларын талап эте ва оланы спортда уьст болмагъа уьйрете. Оьзю буса республика оьлчевюндеги ГТО-ну ярышларында ортакъчылыкъ этип, спортну мастерини кандидаты бола.

1976-нчы йылда ол юрт халкъ театрына ишлемеге тюше, арадан кёп заман гетмей театр салыв художниги, сонг режиссер болуп чалыша. Маданиятны къуллукъчусу болгъан сонг яратывчулукъ ёлунда ол пагьмусун адамгъа гьава тарыкъдай хадирин билип къоллай. Элмурза Агъаевич шолай жаны — къаны булан культурагъа берилгенлерден, театр булан аралаш ол Бабаюртдагъы уьч номерли орта школада физкультурадан дарслар да юрютген.

Элмурза Агъаевич енгил атлетикадан Дагъыстанны етти керен чемпиону, Россияны ветеранларыны арасында оьтгерилеген ярышларда гюмюш савгъатыны еси, Россияны ябушув спортунда эки керен биринчи ерлеге, ГТО-ну алтын белгисине де эки керен ес болгъан. Оьмюрюню кёп йылларын яшлагъа билим беривге ва тарбиялавгъа багъышлагъан Элмурза Агъаевичге «Дагъыстан Республиканы Билим беривюню Отличниги» деген белгиси берилген.

Бугюнлерде Элмурза Агъаевич школада ишлемей, савлай яшавун театргъа багъышлагъан. Район театрны сагьнасында ойналагъан гёрюнюшлени барын да Э.Тонаев язгъан.

Элмурза Агъаевич район газет булан да тыгъыс байлавлукъ юрюте. Ону маъналы шиърулары чакъ-чакъда район газетни бетлеринде толу кюйде печать да этиле.

Уьлгюлю муаллим, халкъ арада абур-сый къазангъан загьматны кёп сюеген Элмурза Агъаевич Тонаевге яшавда къатты савлукъ, насип, ишинде ва спорт яшавунда уьстюнлюклер ва оьрлюклер ёрайбыз.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

26