«Сталин ёлу» деген район газетни алдагъы йыллардагъы сагьифаларын ача туруп…

100 йыл – тарих оьлчевде уллу агьвалат. Шо йылланы боюнда кёп сувлар тёбенге акъгъан, дагъыстанлыланы яшав гьаллары хыйлы алышынгъан. Гьалиден 100 йыл алда къумукъ халкъыбызны эревюллю уланы Жалалутдин Къоркъмасовну гьаракатлыгъы булан РСФСР-ни ичинде айры Дагъыстан автономия республикасын къурмакълыкъ тав республикасыны сонггъу яшавуну тюбюкъарадан алышынывуна себеп болуп токътагъан.

Бизин район учун шо 100 йыл оьсювню ва тюрленивню йыллары болгъан. Давдан алдынгъы, дав ва давдан сонггъу къагьрулу йылларда районну сабанчылары оьзлени загьматы булан жамият-экономиканы оьсювюне тенгсиз къошум этгенлер. Районну загьматчыларыны уьстюнлюклери гьакъда район газетни шо йылларда чыкъгъан гьар номеринде дегенлей язылып тургъан.

Бу йыл савлай Дагъыстан оьзюню асрулукъ байрамын къаршылайгъанда, редакцияны архивлерин гётерип, шо йыллар районну халкъы тёкген къайратлы загьмат гьакъда газетде берилген маълуматланы гене охувчуларыбызны тергевюне бермеге сюебиз. Жан сыйдан тоймас дегенлей, гьаракатыбыз бугюнюбюз саялы оьзлени яшавун районну оьсювюне берген загьматчыларыбыз учун унутулмас эсделик боларгъа умут этебиз.

Агъачлыкъ орнатыв ишлер

Районну колхозлары агъачлыкъ тереклер орнатывда бу йыл хыйлы ишлер этген. Буссагьат колхозларда 0,6 гектар ерге бёлек жынслы агъачланы урлугъу чачылгъан. Агъачлыкъ сызакълар учун 22 гектар ер сюрюлген ва 3 гектаргъа агъачлыкъ питомник салынгъан.

Ондан къайры да 1951-нчи йыл язбашда Моздок шагьардан 85 мингден де артыкъ орнатыв тереклер гелтирилежек.

С.ИСАЕВ

Язлыкъгъа гьазирлик

Геме-Тёбе. Сталинни атындагъы юрт хозяйство артелни членлери язлыкъ чачывгъа тындырыкълы кюйде гьазирлик гёрелер. Къолда бар язлыкъ оьсюмлюклени урлукълары сан якъдан яхшы этилинип тазаланып битген. Тек, олар анализден чыкъмагъан.

Колхоз бугюнлерде юрт хозяйство къуралларына ремонт этивге гиришип тура, гьалиге 3 сабан ярашдырылып битген. Авлакъгъа 150 тон ерли кюйлевючлер ташылгъан. Язлыкъ чачывда ишлежек егив гьайванлар айрыча сакъланып тура.

А.БАЙРАВОВ

Язлыкъгъа толу кюйде гьазирленелер

Люксембург. Карл Либкнехтни атындагъы колхозну колхозчулары ва колхозчу къатынлары 1951-нчи йылны язбашгъы авлакъ ишлерине тындырыкълы кюйде гьазирлик гёрелер.

Язлыкъ чачывгъа гьазирлик гёрювде, колхозчуланы арасында РСФСР-ни ва ДАССР-ни Оьр Советлерине сайлавланы гьюрметине къурулунгъан социалист ярыш баргъан сайын генглеше. Шо ярышны натижасында колхозда гьалиге ерли 35 центнер язлыкъ будай, 3,5 центнер гюлайлан урлукъ, 30 центнер де гьабижай чачма ярайгъан даражасына ерли тазалангъан, 12 сабан ва 25 тырнавуч ярашдырылгъан. Бугюнлерде къалгъан юрт хозяйство къураллар да ярашдырылып тура.

Ондан къайры да колхозда айрыкъ ва бой татавулланы тазалав ишлер башлангъан. Артдагъы сувукълар болгъунча буларда 5,400 метр татавул къазылгъан.

И.БИЛАЛОВ

1951-нчи йылны 30-нчу январда чыкъгъан 8-нчи номеринден

Язлыкъ чачывгъа гьазирлик

Тамаза-Тёбе. РСФСР-ни ва ДАССР-ни Оьр Советлерине сайлавланы гюню — 18-нчи февраль ювукълашып геле. Колхозчулар ва колхозчу къатынлар сайлавланы гюнюн лайыкълы кюйде къаршыламакъ муратда, ону гьюрметине юрюлеген социалист ярышгъа къошулуп борчлар алгъанлар.

Колхозларда айрокъда 1951-нчи йылны язбашгъы авлакъ ишлерине гьазирлик гёрюв баргъан сайын генглеше. Бу ишде Тамаза-Тёбеде Карл Марксны атындагъы колхоз (председатели ёлдаш Шугьайыбов), язлыкъ чачывгъа башгъалагъа уьлгю болардай гьазирлик гёре. Буларда къолда бар язлыкъ урлукълар тындырыкълы кюйде тазалангъан ва олар чачыв даражасына етишдирилген. Шолай да юрт хозяйство алатлары ярашдырыв къызгъын темплер булан юрюлюп тура.

Адиль-Янгыюрт. Язлыкъ чачывгъа гьазирлик гёрюв ишлер Адиль-Янгыюртда Кировну атындагъы колхозда да яман тюгюл. Бу колхозда гьалиге ерли 70 центнер язлыкъ будай, 180 центнер сулу ва 70 центнер де арпа чачма ярайгъан кюйде тазаланып гьазирленген ва иш къураллар ярашдырылып тура.

Кюйге къарагъанда бу колхозда сайлавланы гюню, язлыкъ чачывгъа толу гьазирлик гёрюв булан лайыкълы кюйде къаршыланажакъ.

А.САЛИМОВ

1951-нчи йылны 8-нчи февральда чыкъгъан 10-нчу номеринден

Механизаторланы уьстюнлюгю

Туршунай. Новонадежда МТС-ни коллективи РСФСР-ни ва ДАССР-ни Оьр Советлерине сайлавланы гюню — 18-нчи февральны ишде лайыкълы кюйде къаршылай.

МТС-ни механизаторлары сайлавланы гьюрметине къурулунгъан социалист ярышгъа къошулуп, тракторлагъа, комбайнлагъа ва оьзге юрт хозяйство машинлерин ярашдырывгъа къурумлу кюйде гиришдилер. Олар къысгъа болжалны ичинде сан якъдан яхшы этип, 40 тракторну, 30 трактор сабанны, 18 сеялканы, 16 трактор культиваторну ва трактор тырнавучланы ярашдырдылар.

Бугюнлерде комбайнланы ва тиркев машинлени ярашдырыв къызгъын темплер булан юрюлюп тура. Гьалиге ерли 11 комбайн ва 2-де тракторгъа тагъылагъан бичен чалагъан машинлер ярашдырылгъан.

Механизаторлар, МТС-ни колхозлар булангъы дыгъарын 1951-нчи йылны авлакъ ишлеринде толу кюйде кютмек учун, машинлени сан якъдан яхшы этип ярашдыралар.

Гь.ГЬАЖИЕВ

1951-нчи йылны 11-нчи февралда чыкъгъан 11-нчи номеринден

Оьр тюшюм учун ябушалар

Мужукъай. Ордженикидзени атындагъы колхозну колхозчу къатынлары бу йыл язлыкъ чачывгъа къурумлу кюйде гиришдилер. Буларда Баба-Юрт МТС-ни 9 трактору гечесин-гюнюн бир этип токътавсуз ишлей.

Колхоз ашлыкъдан мол тюшюм алмакъ учун, эрте чачылынагъан къылчыкълы оьсюмлюклени сюрюв планын гюздокъ да ургъагъа айландыргъан ва сабанлыкълагъа 800 тоннадан да артыкъ покълукъ тёкген. Буларда эки-уьч гюнню ичинде тракторлар булан 450 гектар ердеги ургъалагъа борона тартылгъан, шо бир вакътини ичинде 9 гектаргъа язлыкъ будай, 16 гектаргъа АРПА, 44 гектаргъа да сулу чачылгъан ва язлыкъ учун 52 гектар ер сюрюлген.

Бу ишде ондагъы трактористлер Гьайбулла Идрисов ва Нурудин Аталыкъов ёлдашлар башгъалагъа уьлгю болагъан кюйде ишлегенлер. Олар, 20 гектарны ерине гьариси гюнде 25-30 гектар ерге борона тартгъанлар. Шолай да чачывда ишлейген Макидин Даибов ва Агъав Гьажиев ёлдашлар, сан якъдан яхшы этип гюнде 15-20 гектаргъа ашлыкъ чачып юрюгенлер.

С.ДАВЛЕТМУРЗАЕВ

Алдынлы трактор бригада

Баба-Юрт. Ворошиловну атындагъы уллулашдырылгъан колхозну авлакъларында язлыкъ ишлер гьали арт вакътилерде къолайлашфп бара. Айрокъда бу колхозну Гьасанай участкасында ургъаланы ишлетип къызгъын темплер булан юрюлюп тура.

Оьзюне ёлдаш Александр Гравцов башчылыкъ этеген 7 номерли трактор бригада ишде алдынлыкъны алып юрюй.

Ол, бек багьалы заманны къолдан чыгъармайлы, 310 гектарны ерине 550 гектар ургъаны тырнады ва 300 гектар да культивация этди.

Борона тартывда тракторист Сраждин Акъмурзаев 20 гектар гюнлюк норманны ерине гюнде 25-30 гектарны ва культивация этивде буса 12-ни ерине 20 гектанны этип юрюген.

Н.ГЬАНАКЪАЕВ

1951-нчи йылны 21-нчи мартда чыкъгъан 17-нчи номеринден

Миллионер колхоз

Адиль-Янгы-Юрт. Кировну атындагъы уллулашдырылгъан колхоз, районда алдынлы колхоз гьисаплана. Гетген йыл колхозда, мююзлю уллу гьайванланы санаву – 99 процентге, атланы санаву 32-ге, къушланы санаву 753-ге оьсген ва олардан продукта алыв да бир хыйлы артгъан. 1950-нчи йылда бир-бир участкаларда къылчыкълы ашлыкълардан планлы тюшюмлер алынгъан ва гьатта айры-айры звенолар буса мамукъну гьар гектарындан 8,5 ва 13 центнер алмагъа бажаргъанлар.

Колхозну общий йыллыкъ гелимини къадары миллионер – колхозлардан бирисине санала. Колхозну, колхозчуланы загьмат гюнлерине пайланагъан гелими, оьтген йыллардагъысы булан урушдургъанда янгыз гетген йыл уьч керен артгъан.

Колхоз бу йыл 2 гектар ерге янгы юзюм бав салгъан, бу буса колхозну гелимин дагъыдан-дагъы атрдыражагъына шеек ёкъ.

Ж.АЛИЕВ

Районну центры ясандырыла

Районну центры Баба-Юртда, 150 адамгъа ери булангъы уллу янгы кино-театр бинасы ишленип битген. Ювукъдагъы гюнлерде ишге салынажакъ.

Бир нече йыллардан берли ишлемей къаравсуз ташланып къалгъан мундагъы гьамам, район къурумланы гьаракатчылыгъы булан гьали-гьалилерде толу кюйде ишлемеге башлады. Бугюнлерде гьамам гече-гюн дегенлей бир токътавсуз низамлы кюйде ишлеп тура.

Ондан къайры да бу йыл Баба-Юрт МТС-де янгы электрик станция ишленип битген. Ол, МТС-ни чи нечик де ва гьатта Баба-Юртну да, Ильич лампучкаланы ярыгъы булан таъмин этежек.

Балыкъчыланы уьстюнлюгю

Бизин районну аслу байлыкъларын гёз алгъа гелтирсек бир-биринден айырмагъа ярамайгъан кюйде уьч тармакъгъа бёлюне: сабанчылыкъ, гьайванчылыкъ ва балыкъчылыкъ. Районда, туврадан-тувра балыкъ тутув иш булан машгъул болагъан 5 колхозубуз ва бир де балыкъ заводубуз бар.

Балыкъчыланы арасындагъы социалист ярышда Махач-Гентде Ждановну атындагъы колхоз ва Али-Къазгъанда балыкъ завод алда бара. Ждановну атындагъы колхозну балыкъчылары язлыкъ балыкъ тутувну йыллыкъ планын 155 процентге ва балыкъ завод – 132 процентге толтурдулар.

М.БОРАНГЪАЗИЕВА.

1951-нчи йылны 30-нчу апрелде чыкъгъан 22-нчи номеринден