Меню
16+

Сетевое издание «Бабаюртовские вести»

26.02.2021 10:15 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Насигьатчы ва таза юрекли муаллим

Автор: Гезел Хасанова

Гьар ерде халкъны гьайын этеген, юртну оьсювюне, районну тюрленивюне къол ялгъайгъан яшёрюмлени насигьатчысы боладыр деп эсиме геле. Бизин юртда да оьз районуна, юртуна юреги булан янашагъанлар аз тюгюл. Яраш Агьматович Жумакъазиев де шолайланы бириси. Ол таза, ярыкъ юрекли адам деп бир де тартынмайлы айтып боламан, неге тюгюл не заман Яраш Агьматовични янына барсанг, иржайып, гёнгюнг алып, тюз насигьатлар бере.

Яраш Агьматович яшавуну кёп йылларын школа булан байлагъан. Ол Тамазатёбедеги орта школада тарихи дарсланы юрюте туруп, касбу канзисинде директоргъа ерли гётерилген ва 35 йылны узагъында шо тармакъда чалышгъан.

Яраш Агьматовични яшлыгъы бек къыйын шартларда оьтген. Ол 1938-нчи йылда тувгъан. Уллу Ватан дав башлангъанда, Яраш Жумакъазиев сабий чагъында болгъан буса да, давдан сонггъу ачлыкъны сезген.

Ярашны атасы Агьмат 1941-нчи йылда давгъа гетген, 1943-нчю йылда белгисиз тас болгъан. Анасы Узупат увакъ яшлары да булан янгыз къалгъан. Тек огъар дав йылланы къыйынлыгъын бек сезмеге къоймайлы, Ярашны атасыны агъасы Къураш яшланы тарбиясын оьзюне алгъан. Шо замандан тутуп Къураш Ярашгъа атаны орнун тутгъан. Яраш эркек хасиятлы, къоччакъ Къурашдан уьлгю алып яшагъан ва гьар даимге ону оьмюрюнде ол ёл гёрсетеген чыракъ болуп токътагъан.

1956-нчы йылда Яраш Жумакъазиев Бабаюрт эки номерли орта школаны битдирген сонг, Дагъыстан Пачалыкъ университетни тарихи факультетине охумагъа тюшген. Эсгерген оьр охув ожакъны 1962-нчи йылда тамамлап, ол ата юрту Тамазатёбедеги школада муаллим болуп, загьмат ёлун башлагъан.

Яраш Агьматович муаллим касбуну тюз сайлагъанына бир де шеклик этмей, неге тюгюл янгы ёлланы ачыв, тарихни ахтарыв Яраш Агьматовични къанына синген.

Яраш Жумакъазиев школада ишлеген чакъы вакътисинде, яшавуну татыву — ону иши экенге шеклик ёкъ. Райондагъы школаланы арасында компьютер клас биринчилей эсгерилген школада болгъан. Шо да — Яраш Агьматовични яхшылыгъындан. Я.Жумакъазиев бир де эринчеклик не экенни билмеген, гечесин-гюнюн бир этип, били беривню янгы къайдаларын къоллап ишлемеге къасткъылгъан. Ол бары да адам булан къыйышып, уллугъа — уллу, гиччиге — гиччи болуп, абур къазанмагъа бажаргъан.

Яраш Агьматович 2003-нчю йылдан берли Бабаюртда уланы Къураш булан яшай. Ол пенсияда буса да, районну яшавунда актив кюйде ортакъчылыкъ эте, яш наслуну патриот ругьда тарбиялавда къошум этген. Шо саялы огъар «Дагъыстанны яшёрюмлерини ат къазангъан насигьатчысы» ва «Загьматны ветераны» деген гьюрметлев атлар берилген.

Оьзюню уллу чагъына да къарамай, Яраш Жумакъазиев тюрлю-тюрлю ёлугъувлагъа бара, бизин газетни бетлеринде ону бек агьамиятлы макъалалары чыгъа.

Яраш Агьматович яшав ёлдашы Чубаржат Давутгьажиевна булан татывлу агьлюде яшайгъанына 60 йылдан да артыкъ бола. Олар дёрт къызны ва бир уланны тарбиялагъанлар, олагъа оьр билимлер бергенлер.

Бугюнлерде Яраш Агьматовичге уллата ва уллатаны атасы болмагъа насип болгъан. Биз Яраш Жумакъазиевге дагъы да узакъ оьмюр ва къатты савлукъ ёрамагъа сюебиз.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

68