Меню
16+

Сетевое издание «Бабаюртовские вести»

28.02.2021 08:19 Воскресенье
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Юрт хозяйство тармакъны уьлгюлю къуллукъчусу

Автор: Асият Метеева

Яшавну шартлары нечик гелсе де, къысматын оьзю ясагъан, хыйлы йыллар загьмат тёгюп, халкъ арада абурсый къазангъан адамлар кёп бар. Олар бары да гючюн салып, билимин, бажарывлулугъун къоллап, яшавну тюз ёлуна тюшген ва ишинде де атлары яхшыгъа айтылгъан.

Бугюнгю макъалабыз, оьзюню оьмюрюню хыйлы янын районну юрт хозяйствосуну оьсювюне тенгсиз къошумун этген, Дагъыстан Республиканы юрт хозяйствосуну ат къазангъан къуллукъчусу, загьматны ветераны Абдулгьалим Нугьаевич Юсуповну гьакъында.

А.Юсупов 1942-нчи йыл 1 номерли Львовск юртда тувгъан. Ол юртдагъы башлапгъы школаны тамамлай, 1963- нчю йыл Дербент шагьардагъы юрт хозяйство техникумну агрономлар гьазирлейген бёлюгюне охума тюше ва ону яхшы къыйматлар булан 1968- нчи йыл тамамлай.

Техникумну битдирген йыл ол Бабаюртдагъы «Дагъыстан» колхозда ишлеп башлай, 1969-нчу йыл буса, бав-бахча бригаданы бригадири этилип белгилене. 1975-нчи йыл А.Юсупов агроном касбусуна гёре ишлеп башлай. 1985-нчи йыл ол Мужукъай юртдагъы 2 номерли оьсюмчюлюк бригаданы бригадири, бир йылдан сонг ону агроном къуллукъгъа чыгъаралар.

1990-нчы йыл Абдулгьалим «Гьасанай» колхозда баш агроном болуп загьматын давам эте, 1997-нчи йыл республикада реорганизация (колхоз-совхозланы янгыдан къурув), башлангъанда, ол ГУЭОС-ну ёлбашчысыны орунбасары ва баш агроном, 2002-нчи йыл буса, «Гьасанай» ГРЭУ-да участка ёлбашчы, 2004-нчю йыл «Гьасанай» филиалында алдынлы инженер болуп, бу йылны сентябр айы болгъунча ишлеген.

Къайсы касбуну башын тутуп ишлесе де, А.Юсупов ишде оьзюн яхшы къуллукъчу ва билимли специалист гьисапда танытмагъа бажаргъан. Алдына салынгъан масъалаланы тюз ва заманында кютюп, районну юрт хозяйство ашлыкъ болдурувну масъалаларын да чечмеге имканлыкълар болдургъан.

Абдулгьалим Юсуповну къайратлы загьматы пачалыкъны янындан тергевсюз къалмагъан. Огъар Уллу Уьстюнлюкню 20, 60 йыллыгъына медаллар, Гьюрметлев грамоталар, 2000-нчи йыл «Дагъыстан Республиканы юрт хозяйствосуну ат къазангъан къуллукъчусу», 2002-нчи йылда «Загьматны ветераны» деген сыйлы атлар берилген.

Уьлгюлю ата ва уллата А.Юсупов агьлюсю Раиса да булан бирге татывлу ожакъ къуруп яшагъан ва 2 улан 1 къызны тарбиялап, олагъа билимлер берип, яшавда тюз ёллагъа салгъан.

Яшавун къайратлы загьматы булан безеген Абдулгьалим Юсуповгъа савлукъ, авлетлеринден ва оланы да яшларындан сююнюп яшама насип ёрайбыз.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

8