Бу йыл районда янгы уьч парк ачылажакъ
Районда «Шагьарча онгайлы шартлар болдурув» деген федарал программагъа гёре районну уьч юртунда янгы парклар ачылажакъ. Бугюнлерде парклар болажакъ юртларда къурулуш ишлер юрюлюп тура.
Район администрацияны капитал къурулушлагъа ва ЖКХ-гъа къарайгъан управлениесини ёлбашчысы Артур Мингалиев эсгерген кюйде, бу йыл парк бойлар Тотаюртда, Геметёбеде ва Адил-Янгыюртда къоллавгъа берилежек.
«Гетген йыл да биз «Шагьарча онгайлы шартлар болдурув» деген программагъа районну уьч юртун къуршагъагъан эдик. Гьакъыкъатда Тамазатёбеде, Янгы Къарада ва Бабаюртда янгы парклар къоллавгъа берилди. Бабаюртдагъы «Водник» деген поселокда эки парк къурдукъ, шону булан бирге шо бойда яшайгъан юртлуланы ял алывуна хыйлы къошум этмеге болдукъ», -- дей Артур Мингалиев.
Ери гелгенде, уьч де къурулуш районну ёлбашчыларыны къатты тергевюню тюбюнде экенни эсгермеге ярай. Неге тюгюл де, районну ёлбашчысы Даниял Исламовну сёзлерине гёре, яллыкъ бавлар юртлу халкъ учун этиле ва онда бир тюрлю йиберивлер болмагъа тюшмей.
«Этилип турагъан паркларда халкъ ял алажакъ ва огъар багьа гесежек де – халкъ. Шо саялы да гьар проект гьакъ юрекден, мукъаятлы этилмеге герек. Мунда немкъорайлыкъгъа ёл бермеге ярамай», -- дей Даниял Исламов.
Тюзюн айтмагъа герек, артдагъы йыллар районну халкъыны яшавун енгиллешдирмек муратда районда бир-нече проектлер яшавгъа чыгъарылып тура. Шоланы арасында юртларда парк бойланы къурув да халкъны янгыз яллыкъ алывуну тюгюл, оларда экологияны сакълавну масъаласын чечивге де къошум эте.
Ювукъ гележекде районну гьар юртунда шагьарча шартлар болажакъгъа ва шону булан юртлу халкъны яшаву дагъы да енгиллешежекге умут этебиз.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
