Меню
16+

Сетевое издание «Бабаюртовские вести»

15.03.2022 12:05 Вторник
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Оьмюрюню яртысын школагъа багъышлагъан

Автор: Гёзел Гьасанова

Муаллим касбуну сайлагъан адам бек асил, йылы сёзлю, илиякълы болмагъа, оьзюню иссилиги булан яшны тергевюн тартып, ону юрегине сингип бажарма герек.

Охувчу яшлагъа гьакъ юрекден янашагъан герти муаллимлер Мужукъай юртдагъы агротехнология лицейде де кёп бар. Шоланы арасындан оьмюрюню аслам пайын муаллим касбугъа багъышлагъан Юлдузат Гьажабдуллаевна Ногьманованы гьакъында язмагъа сюебиз.

Юлдузат Ногьманова 1944-нчю йыл 28-нчи декабрде Мужукъай юртда тувгъан. Юрт школаны битдирген сонг, муаллим касбугъа гьасиретлиги баргъа гёре, 1962-нчи йылда Буйнакскийдеги тиштайпаланы педагогика училищесине охумагъа тюшюп, 1966-нчы йылда ону тамамлагъан.

Ата юртуна къайтып, Юлдузат Гьажабдуллаевна, тёбен классларда муаллим болуп ишлеп башлай. 1968- нчи йылда Ю.Ногьманова оьр билим алмакъ муратда ишинден айырылмагъан кюйде Дагъыстан Пачалыкъ университетни филология факультетини рус – дагъыстан бёлюгюне охумагъа тюше ва 1975-нчи йылда ону битдирип, ана тилден дарс береген муаллим гьисапда загьмат ёлун узата.

Ол кёп керенлер Гьюрметлев грамоталар булан савгъатлангъан. Юлдузат Гьажабдуллаевна къайратлы загьматы саялы «РФ-ни Билим беривюню Гьюрметли къуллукъчусу», «Загьматны ветераны» деген сыйлы атлагъа лайыкълы болгъан.

Шо йылларда ол школада тарих дарсланы юрютеген муаллим, жагьил улан Абдурагьман булан уьйленип, насипли ожакъ къуралар ва эки уланны, уьч къызны тарбиялап, оьсдюрюп, оьр билимлер бергенлер. Ата-анасыны загьмат ёлуна бир къызы Кавсарат тюшген. Ол бугюнлерде район админстрацияны билим берив управлениеде специалист ва школада химия дарсланы юрютеген муаллим болуп ишлей.

Аты оьр даражада айтылгъан муаллимлени ожагъындан чыкъгъан авлетлер де бек тарбиялы ва билимли деп айтмагъа болабыз, неге тюгюл Абдурагьман ва Юлдузат оьзге яшланы да тюз ёллагъа салып чалышгъан адамлар.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

66