Меню
16+

Сетевое издание «Бабаюртовские вести»

18.06.2021 13:15 Пятница
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Коронавирус булан бетге-бет…

Автор: Г.Аджиев

Дагъыстанда янгы коронавирус аврув чыкъмагъа башлагъаны йылдан артыкъ бола. Аврув ватандашларыбызгъа къоркъунчлукъ салып, жамият арада тез яйылмагъа башлады.

Республиканы Гьукуматыны башын тутгъанлар, тувгъан къыйынлы гьаллагъа асасланып, тез заманны ичинде гетеринки чаралар гёрмеге башлады. Республикада салынгъан къысывлардан къайры да, ерли больницалар коронавирус булан авруйгъанланы багъагъан хас ерлеге айланды. Шолай Дагъыстанны тахшагьары Магьачкъаладагъы югъагъан аврувланы багъагъан республика центры аз заманны ичинде COVID-ни багъагъан центргъа айландырылды ва шо центр янгы аврувну биринчи чапгъыныны алдында турду. Шо центрны врачлары ва гиччи медицина къуллукъчулары, оьзлени касбусуна гёре, гьаи болгъанчагъа белгисиз къалып тургъан аврув булан ябушувгъа башлап турдулар.

Коронавирус аврув булан бетге-бет ябушагъанланы арасында, янгы оьр охув ожакъланы битдирип, касбусуна янгы ес болуп турагъан жагьил врачлар да кёп эди. Шолар учун коронавирус булангъы ябушув, гертилей де, къатты сынав болуп токътады. Мен оьзюню гьакъында язмагъа сюеген Марьян Магьамматованы коронавирус билимин ва къаттылыгъын гьар якъдан сынады. Ол, оьзюню яшлыгъына да къарамай, белгисиз аврув булангъы ябушувун гьали де узата ва эрте-геч олар ондан уьстюн гележекге инана.

Марьян Магьамматова -- Бабаюрт районлу. Ол 1995-нчи йылда Адиль-Янгыюртда тувгъан. Ерли школаны башлапгъы школасын битдирген сонг, ол уьягьлюсю булан Хасавюртгъа гёче. 2011-нчи йылда Хасавюртдагъы 3 номерли С.А.Жанхуватовну атындагъы орта школаны алтын медалгъа тамамлап, ол ойлашмай Дагъыстан пачалыкъ медицина университетге тюше.

Оьр охув ожакъны 2017-нчи йылда битдирип, врач касбугъа ес болгъан Марьян Магьамматова 2017-2019-нчы йылларда Дагъыстан пачалыкъ медицина университетни Магьамиатовну атындагъы "РЦИБ ва СПИД" деген югъагъан аврувланы багъагъан центрны кюрчюсюнде ординатурада охувун узата, «югъагъан аврувланы багъагъан врач» деген квалификациягъа ес бола. 2019-нчу йылдан буссагьатгъа ерли Дагъыстан пачалыкъ медицина университетни югъагъан аврувланы багъагъан кафедрасында ишлей туруп, аспирантурада охувун узата.

Гетген йылдан башлап бугюнлеге етишгенче коронавирус аврув булангъы ябушув гьакъда айта туруп, Марьян Магьамматова "РЦИБ ва СПИД" деген югъагъан аврувланы багъагъан центрны коллективи учун шо гертиден де бир уллу сынав болуп токътагъанны эсгере.

«Гетген йылны март-апрель айларындан башлап бизге коронавирусдан авруйгъанлар гелмеге башлады, -- деп хабарлай Марьян Магьамматова. – Мен ва мени иш ёлдашларыбым, бир-бирибизни алышдырып, коронавирус аврув юкъгъанлар ерлешдирилген «къызыл бёлюкде» ишледик. Озокъда, не аврув булан ябушагъанны ачыгъындан билмейгенге, шо савлукъгъа не йимик зарал гелтирмеге болагъанны англамайгъангъа гёре, къоркъув да бар эди».

Озокъда, башында врачланы алдында сайлав да болгъан. Амма оланы кёплери оьзлени борчун кютмеге, къыйынлы гюн аврувлар булан янаша болмагъа токъташа.

«Башлап бизге къыйын эди. Неге тюгюл де биз оьзюбюзню ишибизде биринчилей болуп пандемиягъа урундукъ. Амма, яныбызда сынавлу иш ёлдашларыбыз баргъа, бизин гёнгюбюзню ачып, къатты инаныв берегенге гёре, яш врачлагъа ишлемеге тынч болду. Бугюн мен бизин врачлагъа, орта ва гиччи медицина къуллукъчулагъа, санитаркалагъа, студентлеге бакъгъан якъда юрегимде оьктемлик тува. Олар бугюнге ерли оьзлени алдында токътагъан борчланы уьстюнлюк кюйде кютюп туралар», -- деп узата Марьян Магьамматова.

Озокъда, Марьян Магьамматова ва ону йимик минглер булангъы врачлар учун пандемия югъагъан аврувлар булангъы ябушувда тенги ёкъ кюйде сынав алмагъа имканлыкъ берди. Шону мени лакъыр ёлдашым да яшырмай ва олар болма болагъан янгы сынавлагъа къаршы турмагъа гьазирлигин билдире.

«Биз аврувну яйылывун асталатмагъа болсакъ да, толу уьстюнлюк алып гьали де битмегенбиз. Неге тюгюл де, аврув янгыдан гюч алмагъа болагъанны гьисапдан тайдырмагъа ярамай. Шо саялы да бизин уьстюнлюгюбюз гьар ватандашдан, олар специалистлер береген насигьатланы юрютегенден гьасил бола. Шо заман биз оьзюбюзню ва ювукъ адамларыбызны савлугъун толу кюйде сакъламагъа болажакъбыз», -- дей Марьян Магьамматова.

Пандемия гьали де узатыла. Ону булан бир йыл алда йимик гьали де къаркъарагъа арыкъ, гючсюз врач къызларыбыз бетге-бет ябушувун узаталар. Оьзлени гьар гюнлюк иши савлугъуна къайтарылмас зарал гелтирмеге болагъангъа да къарамай, олар аврувланы янында табула, оьзлеге Яратгъаныбыз берген гьюнерин ва билимин савлай жамиятыбызны сырасыз аврувдан сав этмек учун къоллайлар. Арабызда шолай къоччакъ врачларыбыз бар туруп, бизде эсде ёкъдан къопгъан балагьдан да арчылланажагъыбызгъа ва тангала оьзюбюз уьйренген яшавгъа къайтажагъыбызгъа инаныв да оьлмей.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

49