Меню
16+

Сетевое издание «Бабаюртовские вести»

21.03.2022 15:58 Понедельник
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Ашамлыкъ малланы багьаларыны артдырывгъа байлавлу

Автор: bab-vesti

Украинада болуп турагъан гьаллар булан байлавлу болуп гюнбатыш уьлкелер башында Американы Бирлешген штатлары булан бирликде Россиягъа къаршы экономикалы дав башлады демеге ярай.

США-ны буйругъуна гёре Европа уьлкебизге гьар тюрлю якъдан къыйыкъсытывланы къоллав узатыла. Гьакъыкъатда Россияда юзлер булан заводлар ва фабриклер ябулду, гьатта ерли маллагъа да багьалар артып тербей. Багьаланы оьсювюн ёрукълашдырмакъ муратда ерлерде чаралар гёрюле, далапчылар булан англатыв ишлер оьтгериле, олагъа енгилликлер гьазирлене.

Артдагъы гюнлерде районда да экомиканы оьсювюне тыш себеплер этмеге болагъан таъсирни алдын алыв хас штаб къурулду. Ону биринчи жыйыны районну башы Даниял Исламовну ёлбашчылыгъыны тюбюнде, Дагъыстан республиканы халкъ Жыйыныны депутаты А. Магьамматов, прокуратураны ва РФ-ни ОМВД-ни Бабаюрт бёлюгюню къуллукъчуларыны ортакъчылыгъы булан оьтгерилди.

Жыйынны ача туруп, район башы Даниял Исламов эсгерген кюйде, оьтгерилеген чаралар, янгыз районну тюгюл, савлай Россияны экономикасын мекенлешдирип, халкъыны жамият гьалын яхшылашдырывгъа бакъдырылгъан.

«Биз, ватандашларыбыз уьлкебизни экономикасына гёрсетилген къыйыкъсытывланы гьис этмесин учун, иш гёрсетме герекбиз. Доллар гётерилген саялы, районда ва республикада чыгъарылагъан малланы багьалары да арта бара. Шо тюз тюгюл экенни барыбыз да билебиз, багьалыкълардан биз ари тайып, адамны яшавунда чинк де тарыкълы болагъан сурсат ва оьзге тюрлю малланы багьаларын бир даражада гётерилмейген кюйде сакъламакъны гьайын этмеге герекбиз», -- деди Даниял Исламов.

Ол оьзюню сёйлевюнде адамлагъа да ерли тюкенчилени англамагъа герек болажакъны, неге десе де олар да малны ломайлап сатагъанлардан багьа берип алагъанны айтды.

«Озокъда, -- деди Даниял Исламов, -- ерли тюкенчилерде багьалар оьсюп турагъан вакътиде оьзлер къошагъан багьаланы кёп артыкъ этмесе яхшы. Шу къыйын гьалда, эгер де олар малгъа 10 манат къоша эди буса, гьали 5 манат къошса да ярай. Биз де сурсат малланы олар ломайлап алагъан складлаланы тергемек учун монополиягъа къаршы иш гёреген Федерал къуллугъуна чакъырыв этежекбиз».

Районну юрт хозяйство управлениесини ёлбашчысы Марат Алтавов да эсгерген кюйде, районда резервде сакълангъан сурсат маллар бар. Оланы арасында будай, дюгю ва районда болдурулагъан оьзге тюрлю сурсат маллар бар. Шону гьисапгъа алып, муниципалитетни башы Даниял Исламов юрт хозяйство тармакъны ёлбашчыларына ва ашамлыкъ малланы болдурувчулагъа эсгерилген резервлени кемитмей сакъламагъа чакъырыв этди.

Оператив штабны жыйынында чыгъып сёйлеген районну прокуроруну орунбасары З. Мамаев, РФ-ни ОМВД-ни Бабаюртдагъы бёлюгюню ёлбашчысы А. Атаев ва оьзгелери далапчылагъа ва ашамлыкъ малланы болдурувчулагъа иш янындан кюрчюсюз тергевлер гелсе, оьзлени янындан болагъан кёмегин этежеги гьакъда айтдылар.

Жыйынны барышында ону ортакъчылары районну экономикасыны оьсювюню ва тувулунгъан масъалаланы чечив ёлу гьакъында да пикирлешдилер.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

32