Терен гьакъыллы, исси сёзлю муаллим

Адил-Янгыюртда башлапгъы школа къурулгъанлы 150 йыллар бола. Тарихни терен къатлавларында тамур ташлагъан школабызны алаша посагъасындан нечесе наслулар чыкъгъан, нечесе охувчулар яшавну шагьра ёлунда оьз гьызын къойгъан. Оланы барысын да санамагъа да бажарылмай.

Былтыр вакътилерден тутуп, бугюнлеге етишгенче школаны гёрюнюшю ону ичинде загьмат тёгеген муаллимлер булан байлавлу. Оьзлени билими, къатты талаплары, насигьатлары булан муаллимлер школаны бай эте, охувчуланы тюз ёллагъа тюшмеге иштагьландыра. Школаны битгенли арадан 25 йыллар гетген булан да, бир вакътини ичинде клас ёлбашчыбыз болуп тургъан, артдагъы 28 йылны боюнда школаны ёлбашчысыны охув якъгъа къарайгъан орунбасары Садина Мусаевна Атаева шолай муаллимлени бириси.

Садина Атаева 1969-нчу йылда Адил-Янгыюртда Мусаны ва Рабиятны агьлюсюнде тувгъан. 1974-нчю йылда 5 йыллыкъ Садина юрт школаны 1-нчи класына бара. Ерли школада охуйгъан йылларда да, чагъына гёре ол тенглилеринден гиччи буса да, билим якъдан олардан бир кертге де артда къалмай, терсине, кёбюсю гезиклерде озма да оза. 1985-нчи йылда юрт школаны яхшы къыйматлагъа тамамлап, Садина Атаева Дагъыстан пачалыкъ педагогика институтну физика-математика бёлюгюне тюше. Оьр билимге ес болгъан сонг, ол 1990-нчы йылда юртуна къайта ва оьзюн яшавну генг сокъмагъына чыгъаргъан анадаш школасында муаллим гьисапда загьмат ёлун башлай. Башлап ол школада физика дарсланы юрюте ва пионер вожатый болуп чалыша.

1993-94-нчю йылларда бизин класгъа да ол ёлбашчылыкъ этди. Физика дарсларда буса ону кёмеклиги булан гьар гюнлюк яшавда ёлугъагъан физика гьаллагъа тюшюндюк, электрик токню гючюн таныдыкъ, атомну малекуладан айырып уьйрендик.

Муаллимден къайры да, Садина Атаева гючлю тарбиялавчу да дюр эди. Ол гьар танапусда класда бола эди, яшлар булан гьакълашып, оланы къыйын-дертин билмеге, тарыкъда кёмек этмеге къасткъыла эди. Охувчуларыны тарбиясына чы нечик де, гийимине де тергев бере, тарыкъ ерде уруша, англата. Бизин эсибизде Садина Атаева тап шо келпетде сакълангъан.

Сонг ол школаны ёлбашчысыны охув якъгъа къарайгъан орунбасары болду, бизин буса физика дарслар- дан муаллим гьисапда 11 класны битдиртди. Ону дарслары тамаша тез гете, гьар яш физиканы теренине гирмеге, билимин камиллешдирмеге къаст эте эди.

11 класны битегенде биз кёп сююп физика дарсдан экзаменни сайладыкъ. Шо дарс бизге нечик ювукъ болгъангъа, озокъда, Садина Атаеваны къастлыгъы бар эди. Экзаменни алдында Садина Мусаевна мени шондан эркин этегенни билдирди, экзаменни алдында оьзюне кёмекчи этип белгилемеге сюегинни айтды. Клас ёлдашларым бары да экзаменлер берип де чыкъдылар. Гьакъыкъатда менден буса айрыча экзамен алынды. Шо экзаменге школада физика-математика дарсланы юрютеген бары да муаллимлер жыйылдылар. Янгылышмадым, гьар жавабымны муаллимим англатгъан кюйде айтдым, ону абурун ер этмедим. Озокъда, шо бары да – эсделик. Гьар гезик Садина Мусаевнаны гёрсем, гьалиден 25 йыл алда болгъан шо ахырынчы экзаменим эсиме геле. Магъа шо терен билимни бермеге болгъан муаллимим булан оьктем боламан.

Садина Атаева буса гьали де оьзюню алдына салынгъан борчланы уьстюнлю кюйде кюте. Ону иш ёлдашлары ва охувчулар абурлайлар, оланы къыйынына кёмекчи, яхшылыгъында буса герти къурдаш гьисапда табула.

Охувчуланы тарбиялавда етишген уьстюнлюклери саялы Садина Атаева районну ва республиканы янындан кёп керенлер савгъатлангъан. Гетген йыл Садина Мусаевна «Россия Федерациясыны билим беривюню ва тарбиялавуну гьюрметли къуллукъчусу» деген белги булан да савгъатланды.

Садина Атаева сююмлю ана ва уллана да дюр. Агьлюсю Алевдин булан ол сюювде ва инамлыкъда уланны ва къызны тарбиялагъан. Олар да, оьр билимлеге ес болуп, гьариси оьзлер танглагъан касбуда загьмат тёгелер.

Етишип гелген къатынланы Халкъара гюнюню алдында мен аявлу муаллимим ва тарбиялавчум Садина Мусаевнагъа къатты савлукъ, яшавуну чечеги бир де сёнмей, сюювде ва татывлукъда узакъ оьмюр яшамакъны ёрамагъа сюемен.