Загьмат чыныкъдыргъан Камийса

Камийса Солтанмуратовна 1932-нчи йыл Къачалай юртда тувгъан. Ол ата юртунда 4 класлы школаны битдирген ва агьлюсю булан Хамаматюртгъа гёчген.
1948-нчи йыл 16 йыллыкъ Камийсаны Багьав Абакаровгъа эрге бергенлер.
Оьз ожагъыны сююв отун сёнме къоймайлы 70 йыл татывлу яшагъан сонг, 2018- нчи йыл Камийсаны эри гечинген.
Ол бек къыйынлыкъда оьсген, неге тюгюл ону яшлыгъы ач дав йыллагъа къаршы гелген. Танг
намаздан тутуп, гиччинев яшлар буса да, фронтгъа кёмек этмек къастлыкъда, будай башланы жыйып, мамукъ чёплеп, гьабижай оруп, фронтгъа йибермеге онгара болгъанлар.
Жагьил заманында нечакъы къыйын болса да, ол къайпанмагъан, оьзюн чыныкъдыргъан.
Хыйлы заман Камийса Абакарова колхозда, сонгунда совхозда звеньевой болуп чалышгъан.
Ону къайратлы загьматы тюрлю-тюрлю медаллар ва орденлер булан белгиленген. Ол — Уллу Ватан давну ва Загьматны ветераны.
Агьлюсю Багьав булан, олар беш яшны аякъгъа тургъузуп, гьарисине билимлер бергенлер. Бугюнлерде авлетлери, оланы яшлары ва балаларыны балалары Камийсаны сююндюре. Ол гьар авлети яшавда тюз ёлларда оьз къыйыны булан яшайгъангъа эпсиз шат.
Уллу уланы Агьматпаша Къызлар шагьарда прораб болуп ишлей, экинчи уланы Насирдин Магьачкъалада яшай ва электрик болуп ишлей, гиччи уланы Пахурдин буса Аштархан шагьарда МЧС-де ишлей.
Къызлары да оьзлер сюеген касбусуна гёре загьмат тёгелер. Чагъы 92 йылгъа етишген анасы сав-саламат оьзлени янында экенге яшлары да сююнелер.
Бугюнлерде де Камийсаны, уллулугъуна да къарамайлы, къатты савлугъу бар. Ол район ва республика газетлерде рус ва къумукъ тиллерде чыгъагъан макъалаланы, гёзюне гёзелдириклер де гиймейли, кёп сююп охуй. Загьмат адамны чыныкъдыра, къатты эте деп шулай заманда айтыладыр.
Биз Камийса Солтанмуратовнагъа узакъ оьмюр, авлетлерини къыйынлыкъларын гёрмейли сююнюп яшамакъны ёрайбыз.