Асил, гючлю тиштайпалар бизин юртларда яшай

Шолай оьз яшавун агьлюге, загьматгъа багъышлагъан, кёп къыйынлыкълар гёрген юртлу тиштайпа Акъыдат Пашаевна Абакарова булан сизин таныш этмеге сюебиз.

А.П.Абакарова бир номерли Львовск юртда 1932-нчи йылда 15-нчи июнда тувгъан. Кёп гиччилейин ол яшавну къыйынлыкъларын сезген. Оьзюне алты ай болагъанда, ата-анасыз къалгъан авлетге яшамагъа тынчмы дагъы. Акъыдатны эсинде оланы бет келпети де ёкъ, янгыз суратлагъа къарап таныса тюгюл, ол ата-анасын билмей. Ону анасыны уланкъардашы алып сакълагъан ва аякъгъа тургъузгъан. О да давгъа гетген сонг, сегиз йыллыкъ Акъыдатны ят адамлар тарбиялагъан. Эки уланкъардашын да ятлар оьсдюрген. Уллусу давгъа гетип, белгисиз тас болгъан, экинчиси буса, уллу болгъан сонг гечинген.

Ол эртерек уллу болуп къалгъан, неге тюгюл давну аччылыгъы янгыз уллулагъа тийип къоймагъан, ону гиччилер де сезген.

Акъыдат эсгереген кюйде, сегиз йыл болагъанда, Чувал къотангъа барып, окоплар къазмагъа кёмек де этген, ата юртунда фронтгъа мамукъ да жыйгъан. Озокъда, загьмат адамны чыныкъдыра, тек гиччинев къызъяшгъа уллулар этеген ишни кютмеге бек къыйын болгъандыр. Дав битип, Уллу Уьстюнлюк гелгенде, Акъыдатгъа он уьч йыл бола болгъан. Ол парахатлыкъ болгъангъа эпсиз бек сююнген. Нечакъы къыйын болса да, Акъыдат Пашаевна охувун ташламагъан. Бешинчи класны битгенче, Акъыдат Бабаюртдагъы бир номерли орта школада охугъан.

Ата-анасыз къалгъан, ятлар оьсдюрген яшланы къысматы бек къыйын болгъан. Намусгъа байланып, языгъы чыгъып, оланы оьсдюрсе де, давдан сонггъу ач йылларда, оьзлени яшларын сакъламагъа да бек къыйын заман тувулунгъан. Шо саялы Акъыдатны он дёрт йыллыкъ заманында Алевдин Абакаровгъа эрге берип къойгъан. Гиччилейин уьй тикме тюшсе де, Акъыдат бек тындырыкълы ожакъ къургъан.

Ол ишлемейли бир гюн де турмагъан. 1965-нчи йылда школа-интернатда тарбиялавчу, сонг да санэпистанцияда дезинфектор болуп чалышгъан. Яшлайын эрге де барып, алты къыз ва уьч улан да табып, оланы гьарисин тарбиялап, тюз ёллагъа салмагъа бажаргъан Акъыдат Пашаевна яшавунда оьр даражалагъа етишген деп айтмагъа болабыз. Оьзюню кёп сюеген эри Алевдин булан ол 61 йыл татывлукъда, оьзгелеге уьлгю болагъан кюйде яшагъан.

Гетген йыл Акъыдат Пашаевнагъа 90 йыл тамамланды. Ол къагьрулу заманларда оьмюр сюрген буса да, эли учун тёкген къыйынланы къыйынлыкъгъа санамай.

Бугюнлерде Акъыдатны тёшю медаллагъа толгъан. Ол гиччилейин тёкген тер тергевсюз къалмагъан. Ол гиччиневлейин Ватанына аминли болгъаны саялы огъар Уллу Уьстюнлюкню гюнюнде юбилей медаллар тапшурула.