Сююмлю олжа, ана ва гьакимият къуллукъчу

Мен оьзюню гьакъында язмагъа сюеген Жамиля Дибировагъа Яратгъаныбыз шолай къысматны савгъат этген. Ол – сююмлю ана ва олжа, уьй очакъны сакълавчусу, муаллим ва районну администрациясыны ишлерине къарайгъан бёлюгюню управляющийи.

Ж. Дибирова 1966-нчы йылда бабаюртлу Солтахан ва Забия Дибировланы агьлюсюнде тувгъан къызланы уллусу. Атасы Солтахан хыйлы йыллар киномеханик болуп ишлеген, анасы Забия буса, администрацияда статуправлениеде кёп заман загьмат тёкген. Ону алгъан билимине гёре касбусу педагог экенге гёре, беш де къызны къатты кюйде тарбиялап оьсдюрген.

1973-нчю йылда Жамиля Бабаюртдагъы 1 номерли орта школаны 1-нчи класына бара. Анасы Забия гьаманда охувну биринчи ерге салагъангъа гёре, Жамиля да охувгъа муштарлы, терен билимлеге ес болмагъа амракъ болуп оьсе, школаны яхшы къыйматлагъа тамамлай. Школаны партасын ол 1983-нчю йылда Дагъыстан пачалыкъ педагогика университетни столуна алышдыра. Онда да ол тенглилеринден билими булан айрыла, билимин теренлешдирмеге къаст эте. Гьакъыкъатда, 1988-нчи йылда ол Оьр охув ожакъны къызыл дипломгъа тамамлай.

Мени анам -- илмугъа бек муштарлы адам, бизден ол шону талап эте эди. Ол чакъ-чакъда: «Къарагъыз чы пеленчеге, арив охугъан, билим де алгъан, гёремисиз, не даражалагъа етишген», – деп ал танышларыны къызларын-уланларын мисалгъа гелтире эди. Биз де, беш де къызардаш, ону сёзюн ер этмей, къасткъылып охудукъ, охув ожакъланы яхшы къыйматлагъа битдирдик, гьарибиз оьзюбюз сюеген касбулагъа ес болдукъ. Бугюн дёрт де къызардашым Магьачкъалада ишлейлер ва яшайлар», -- деп хабарлай Жамиля Солтахановна.

Оьр билимге ес болгъан Жамиля Дибирова 1988-нчи йылда загьмат ёлун 1 номерли Львовский юртдагъы орта школада тарихи ва ихтияр дарсланы муаллими гьисапда башлай. Арадан йыл гетип, Ж. Дибирова оьзюню билимин ва сынавун эсгерилген школада тарбиялав ишни къурумчусу гьисапда яшавгъа чыгъара. 1990-нчы йылда буса Бабаюртдагъы 3 номерли орта школагъа тарихи дарсланы муаллими болуп чыгъарыла.

Яшлагъа билим беривде биринчи уьстюнлюгюн Жамиля Солтахановна 1995-нчи йылда къаршылай. Айтагъаным, шо йыл ол «Йылны муаллими» деген ат къазана ва огъар 1 миллион манат тапшурула. Арадан уьч йыл гетип, 1998-нчи йылда буса огъар «Дагъыстанны халкъ муаллими» деген белги, РФ-ни лап да яхшы муаллимлерини арасында юрюлген конкурсда утгъанлыгъы саялы буса Дагъыстанны билим беривге ва илмугъа къарайгъан министрлигини Гьюрметлев грамотасы да бериле. 2010-нчу йылда «Россияны умуми билим беривюню гьюрметли къуллукъчусу» деген гьюрметлев белги булан савгъатлана.

Яшдан берли юрегинде яшайгъан терен билимлеге ес болмагъа умутун яшавгъа чыгъармагъа муратда, Ж. Дибирова 1994-нчю йылда Москвадагъы далапчылыкъны ва ихтиярлыкъны институтуна тюше ва ону 1996-нчы йылда уьстюнлю кюйде тамамлай. 2013-нчю йылда буса Жамиля Дибирова Дагъыстан пачалыкъ техникалы университетни билимин камиллешдиреген курсланы «Пачалыкъ ва муниципал къурумчу» деген бёлюгюн къызыл дипломгъа тамамлай.

Гьамимият къурумгъа Жамиля Дибирова 2007-нчи йылда геле. Шо йыл шо вакътиде районну башы болуп ишлеп тургъан Адилхан Гьанакъаев Жамиляны район администрациягъа чакъыра ва районну администрациясыны ишлерине къарайгъан бёлюгюню управляющийи болуп чыкъмакъны таклиф эте.

«Магъа шо ишни таклиф этгенде, тюзю, башлап башыма шо къуллукъну юрютюп боларманмы экен деген ой гелди. Ойлашдым, чыкъмагъа разилигимни бердим. Озокъда, башында къыйын эди. Яшлагъа дарс бермек бир зат, район администрацияны ишлерин юрютмек буса – бютюнлей башгъа. Уьйрендим, бугюнге ерли де шо къуллукъдаман», -- дей ол.

Жамиля Дибирова район гьакимият къурумда ишлейгенден къайры да, уьюнде янгъан очакъны сакълавчусу да дюр. Ол агьлюсю Абдулла булан татывлу ожакъ къуруп, эки къызны тарбиялайлар.

«Мени инг уллу байлыгъым – уьягьлюм. Агьлюде англав бар буса, къалгъан зат бары да эбине геле. Мен – анаман, шо саялы да уьягьлюмню ва авлетлеримни аманлыгъы башлап мени елкемде», -- дей Ж.Солтахановна.

Биз де Жамиля Дибировагъа узакъ оьмюр, яшавуну гюлю бир заманда да сёнмей, сююмлю болуп, агьлюсю Абдулла булан татывлукъда узакъ йыллар яшамакъны ёрамагъа сюебиз.