Физкультура ва спорт булан яшланы тарбиялай
Физкультура ва спорт яшёрюмлени тюз тарбиялавунда аслу ерни тутагъанны бирев де инкар этип болмас. Ону булан машгъул болагъан яшёрюмлер янгыз къаркъарасын чыныкъдырып
да къоймай, олар ругьун ва гёнгюн де гётере, гьар тюрлю спорт ярышларда гюч сынап, уьстюнлюклер къазанып, оланы сююнчюне сююнч къошула, гележекде дагъы да оьрлюклер къазанмагъа къасткъыла, оьзлени гьар гюнюн тюз пайлап, орамны таъсиринден, терс, зарал ёллардан арек бола.
Гьар къайсы якъдан алгъанда да, физкультура ва спортну халкъ арада уллу агьамияты ва пайдасы бар.
Бугюнлерде бизин школаларда физкультура дарсланы юрютеген муаллимлер шогъар генг кюйде болушлукъ эте. Къурманай Магьамматов да шолайланы бириси.
Къурманай Изамутдинович Магьамматов Янгы Хаса юртдагъы Хангерей Исмайыловну атындагъы школада ОБЖ ва физкультура дарсланы юрюте.
Ол юртлу яшланы арасында физкультурагъа ва спортгъа сюювню ва абурну генг кюйде сингдирмеге гьаракат этеген сынавлу муаллим. Школада спорт ярышлар оьтгерип, яшланы оьзю юрютеген дарслагъа иштагьлыгъын ва тергевюн артдыра ва оланы къуршамагъа къасткъыла.
-Гьалиги заманда гьар инсан оьзюню савлугъуна уллу агьамият ва тергев булан янашмагъа герек бола, — дей мени булангъы лакъырында Къурманай Изамутдинович, – Шону гёз алгъа алып, яшланы гиччиден савлукъ якъдан чыныкъдырмагъа къасткъылабыз. Гьар гюнлюк ишимде огъар уллу агьамият беремен. Гележекде аты айтылгъан спортчулар болмаса да, физкультура ва спорт булан гиччиден дос тутмагъа герек деп санайман. Яшлар физкультура дарслагъа
кёп сююп гелегени мени ишимде бек ругьландыра.
Ол оьзюне тапшурулгъан борчларына тергевлю янашып, охувчу яшланы ва оланы ата-аналарыны герти гьюрметин ва баракалласын къазангъан муаллим.
Муаллимни сёзлерин школаны завучу Гьайбат Салаватовна да гертилей:
– Къурманай Изамутдиновични дарсларына яшлар кёп сююп баралар. Ол ишине бажарывлугъун ва гьаракатын салып чалышагъан сынавлу муаллимибиз, футбол ва олай да башгъа оюнланы гьюрметин ва абурун артдырмакъ учун тюрлю - тюрлю спорт чаралар, ярышлар, оюнлар
оьтгере.
Гьайбат Салаватовнаны сёзлерине гёре, Къурманай Изамутдинович оьзю де даимде билимлерин камиллешдиреген, билим беривню биринчи категориялы муаллими.
Къ. Магьамматов барыда совет халкъ шат ва сююнчлю оьтгереген байрам гюн 9 майда 1983 — нчю йылда Янгы Хаса юртда тувгъан. 1998 - нчи йыл ата юртундагъы школаны уьстюнлю кюйде тамамлап, Избербаш шагьардагъы педагогика колледжге охума тюше.
2002 — нчи йылда охув ожакъны битдирип, эр намусун кютмеге, асгерге чакъырылып гетген. Ондан къайтгъан сонг, загьмат ёлун 2005 — нчи йылда анадаш школасында башлай ва бугюнлеге ерли онда ишлей.
Къурманай Изамутдиновични агьлю чери де муаллим. Оланы татывлу ожагъында 4 яш оьсе. Авлетлерини лап да уллусу — къызы Москва шагьарда медицина охув ожакъда, уьч де уланы
буса школада охуйлар. Атасы уланларында гиччиден спортгъа къуршамакъны гьайын эте.
Охувчу яшланы физкультура ва спорт булан тарбиялайгъан муаллим Къурманай Изамутдинович Магьамматовну гелеген касбу байрамы Бютюн Россияны физкультурачысыны гюню булан къутлайбыз, огъар яшавда шатлыкъ ва насип, ишинде уьстюнлюклер ва оьрлюклер ёрайбыз.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
