Савлукъ сакълав тармакъны отличниги Рупия

Рупия Батыркъазиева 1954 - нчю йыл 15 февралда тамазатёбели Гьакимни ва Саливню
агьлюсюнде тувгъан. 1971 — нчи йыл юрт школаны битдирип, кёп заман ойлашып турмай, гиччиден медицина къуллукъчу болмагъа гьасирет къызъяш, экзаменлени уьстюнлю кюйде берип, Къызлар шагьардагъы медицина училищеге охума тюше.
1975 — нчи йылда эсгерилген охув ожакъны тамамлап, къолуна дипло да алып, ата юртундагъы больницада загьмат ёлун башлай.
О йылларда больницаны баш врачы Байсолтан Устарбеков яш касбучуда ишине берилгенликни ва жаваплылыкъны гьис эте.
Аз заманны ичинде Рупия касбуну сырларына тюшюне, аврувланы баракалласын ва иш ёлдашларыны гьюрметин къазана.
Арадан эки йыл гетип, ол агьлю шартлагъа гёре, Бабаюртдагъы район больницада кёп сюеген касбусун узата. Башлап бир — нече ай Санэпидстанцияда, сонг буса больницаны инфекция
бёлюгюнде борчларына жаваплы янашып, сабур — саламат, илиякълы кюйде гьар аврувну юрегине ёл таба. Неге тюгюл де, медицина къуллукъчудан кёп зат гьасил болагъанны ол яхшы англай.
- Дюньяда адамны савлугъундан багьа бир затда ёкъдур, — дей Рупия, — Савлукъ инг уллу савгъат ва байлыкъ деп ташдырып айтмагъа сюемен. Медсестраны касбусун сайлагъаныма бирде гьёкюнмегенмен. Иш ёлумда насигьатчы гьисапда касбу усталыгъы булан кёплер
ёлукъгъан. Биринчи гюнлеримден башлап, насигьатчы болуп ата юртум Тамазатёбе участка больницаны баш врачы Байсолтан Устарбеков гьайлы янашып, танглагъан касбума инамлыгъына инамлыкъ къошуп, ругьумну гётерди. Инфекция бёлюкню о замангъы
заведующийи Нажмутдин Бекболатов да пайдалы насигьатлары булан, магъа илгьам берди десем ялгъан болмас. Мени касбу ёлумда олай адамлар ёлукъгъангъа къысматыма разимен.
Рупия гьар аврувгъа арив сёйлеп, сюйкюмлю иржайып, оланы юреклерине инамлыкъ ва сабурлукъ салмагъа сюе. Шо саялы да аврувлар огъар тийишли кюйде сый да, абур да этелер.
Р. Батыркъазиева 19 йылны боюнда больницаны инфекция бёлюгюнде ишлеп, касбу сынав топлагъан. Шо йылланы узагъында бёлюкде гюндюзгю де, гечели де постдагъы ва баш медсестра да болуп, яллыкъ билмей ишине берилген.
Бугюнлерде Рупия Батыркъазиева район больницада халкъны прививкалар булан таъмин этеген картотекада ишлей.
Савлукъ сакълавда заманында тийишли прививкалар этмекни уллу агьамияты ва даражасы бар. Заманында этилген прививкалар кёп аврувланы алдын алмагъа бола. Ону яхшы англайгъан Рупия оьзюню борчларына гьар заманда йимик жаваплы ва мекенли янаша.
Рупия оьзюне тапшурулгъан юртлардагъы халкъны учётун юрюте. Олагъа чагъына гёре прививка этмеге гереклени тергевюню тюбюнде сакълай. Юртлардагъы фельдшерлер ва оьзге медицина къуллукъчулар булан тыгъыс кюйде байлавлукъда ишлей.
Ону ишине берилгенлиги жавапсыз къалмагъан. Оьрде эсгерген йимик, Рупия Батыркъазиева «Дагъыстан Республиканы савлукъ сакълав тармагъыны отличниги» деген сыйлы атгъа ес
болгъан.
Гьар йыл ол медицина къуллукъчуланы касбу байрамында Гьюрметлев грамоталагъа ва баракалла кагъызлагъа лайыкълы бола десек ялгъан болмас.
Савлукъну сакъламакъ учун даим гьай этилме герек. Савлукъ сакълав тармакъда загьмат тёгегенлер бу сёзлени гертилигин оьзлени гьар гюнлюк иши булан исбатлай. Оланы сыдрасында юреги авуп танглагъан касбусуна амин болуп яшавун къургъан сынавлу
медицина къуллукъчу Рупия Батыркъазиева йимик касбусуна амин болуп янашагъанлары кёп бар. Энниден сонг да Рупия Батыркъазиевагъа ва оланы барысынада аврувланы гьайын этивдеги ишинде уьстюнлюклер ёрайбыз.