Уллу Уьстюнлюкге аслам къошум этгенлени бири эди
Йыл сайын Уллу Ватан давну ортакъчылары уьлкебизде аз къала.
Бизин районда буса ону жанлы шагьатлары бири де къалмагъан. Амма оланы атлары, гёрсетген игитлиги ва къоччакълыгъы наслуланы эсинде къалажакъгъа шеклик тувдурмай.
Ана Ватанын, ана топурагъын якълап, къанлы ва къатты урушларда ябушгъанлар гьар девюрде де абургъа ва макътавгъа лайыкълы.
Уллу Уьстюнлюкню къазанып, ата юртуна къайтмагъа насип болгъанланы арасында тамазатёбели Халимбек Шугьайыбов да бар.
Дав йылланы жанлы шагьаты ва ветераны, Украинаны топурагъын немис-фашистлерден азат этивде гючлю гьужумларда ортакъчылыкъ этген Халимбек Шугьайыбовну халкъ арада герти абуру да, гьюрмети де бар эди.
-Буссагьатда Украина булангъы дазуда болуп турагъан къайгъылы агьвалатлар гьар адамны да ойгъа сала. Янгыдан бендеревчилер ва миллетчилер баш гётерип, он йылланы боюнда Донбасс бойларда яшайгъан халкъ оланы зулмусундан азап чекген.
Уллатам Халимбек Украинаны топурагъын немис елевчилерден азат этгенлени бириси экенге мен оьктем боламан, — дей Халимбекни уланыны уланы Зайырбек Шугьайыбов.
Тамазатёбели къоччакъ улан Халимбек душманны къува туруп, Европаны халкъында елевчюлерден азат этип, олагъа парахатлыкъ гелтирген.
Ол оьзю сав заманда, давну гьакъында хабарлама сюймей болгъан.
Школада охувчу яшлар булангъы ёлугъувларда, ол аз сёйлеп, дюньяда давдан уллу балагь ёкъ деп, парахатлыкъны асырап сакъламагъа уллуну да, гиччини де чакъыргъан.
Халимбек оьзюню гьакъында кёп айтмаса да, дав савгъатлары ону гьакъында айта эди.
Кривой Рог, Никополь, Варна ва олай башгъа шагьарланы азат этивде гёрсетген игитлиги саялы ефрейтор Х. Шугьайыбов Баш Командую щий ёлдаш Сталинни атындан кёп санавдагъы баракалла кагъызлагъа ес болгъан.
Халимбек Шугьайыбовну тёшюн «Германиядан уьст болгъан саялы», «Уллу Ватан давдагъы йылларда къайратлы загьматы учун», «Уллу Ватан давдагъы Уллу Уьстюнлюкню 40 йыллыгъына» ва «Ватан давну Экинчи даражасы» деген медаллар ва орден безей эди.
Давдан сонгъу йылларда, Халимбек оьзю ушатып, юртлу къыз булан уьйленип, бирликде ва татывлукъда 4 къызны ва 1 уланны оьсдюрген. Оланы тюз тарбиялап, билим алмагъа болушлукъ этип, уллу ва зор яшав ёллагъа салгъан. Оларда оьзлер юреги авуп танглагъан касбулагъа ес болуп, гьар - тюрлю тармакъларда загьмат тёгелер.
Халимбек де сатыв — алыв тармакъда, юртдагъы сельпону заведующийи болуп чалышгъан. Оьзюн ишин яхшы билеген ва юртлулагъа къуллукъ этмеге гьазир касбучу гьисапда гёрсетмеге
бажаргъан.
Халимбек Шугьайыбов юртлуланы эсинде асил къылыгъы, оьзден хасияты, исси сёзлери булангъы адам гьисапда къалгъан.
Ол 1987 — нчи йыл 27 октябрде, оьзюне 76 йыл болагъанда, яшавдан гетген. Йыллар гетип, нече сувлар эниш акъса да, Халимбек Шугьайыбов йимик, намус — ягьгъа байланып, оьзден
кюйде яшав къургъан Ватанны герти якълавчуларыны атлары яш наслугъа уьлгю болуп токътажакъ.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
