Загьмат булан гетген оьмюр

Эмилия Пашаева кёп йылланы боюнда юртдагъы Карл Либкнехтни атындагъы колхозда загьматгъа къуршалып, сав оьмюрюн йиберген. Ону гьакъында айта туруп, бу ерде Эмилия немис халкъны вакили экенни эсгерме сюемен.
Тарихде белгили болгъан йимик, бизин районну топурагъында Дагъыстан миллетлер булан янаша оруслар, корейлилер, немислер ва олай да башгъа миллетлер дослукъда ва татывлукъда
яшагъан. Немис халкъны вакиллери айрокъда Люксембург юртда кёп болгъан. Олар бу юртда тувуп — оьсгенлер.
Эмилияны ата — анасы Эдмунд Эдуардович ва Лидия Мартыновна Найманлар да Люксембург юртда тувгъанлар. Экиси де бир йыл, ачыкъ этип айтгъанда, 1927 — нчи йылда тувгъанлар.
Уллу Ватан дав башлагъанда, оланы, немис миллетни вакиллери деп, агьлюлери булан сюргюн этип, йыракъ Къазахстан бойлагъа бакъдыра.
Лидия Наймангъа Къазахстанда ишлейгенде «За освоение целины» ва «50 — летие Победы в Великой Отечественной войне» деген медаллар да тапшурулгъан.
- Мени ата — анам сав оьмюрюн колхозда ишлеп йиберген адамлар эди. Бир гюнде олар бош турмагъан. Колхозну иши саялы заманын, савлугъун къызгъанмай чалышагъан загьматчылар эди. Олар тувуп — оьсген ата юрту Люксембургну оьтесиз кёп сюе эди.
Йыракъ эллерден, юртгъа къайтгъанда оланы сююнчюню ва шатлыгъыны дазусу болмагъан. Къысматында ёлукъгъан тогъаслагъа чул бермеген, ругьдан тюшмеген.
Олар мени чыдамлы, низамлы, жаваплы, адилли болмагъа уьйретген. Оланы варислигине амин болуп яшавумну къураман, — дей Эмилия.
Эмилияны ата — анасы Эдмунд ва Лидия Найман 1990 — нчы йыллагъа ерли анадаш колхозунда ишлеген. Олар иш булан чыныкъгъан загьматчылар болгъан. Атасы колхозну авлакъларында
сувчу болуп, мол тюшюм ашлыкъланы болдурувда оьзюню къошумун этген. Анасы да емлер гьазирлейген цехде этек салып чалышгъан.
Ят эллерде солтан болгъанча, оьз ватанынгда ултан бол деп бизин ата - бабалар негьакъ айтмагъан. Эмилияны ата — анасы ата юртуна къайтгъанда, бир гюнде бош турмагъан. Уллу ругь ва гюч булан юртдагъы колхоздагъы ишлеген. Белгили болгъан йимик, немис миллетге хас къылыкълар деп саналагъан низамлыкъ, жаваплыкъ, чыдамлыкъ, ишни тындырыкълы ва мекенли кютюп, ким де сукъланардай ерине гелтирип кютеген хасият Эдмундну ва Лидияны къанына синген болгъан.
Эр — къатын Найманланы юртда уллу абуру ва сыйы болгъан. Олар юртлулар булан дослукъда, татывлукъда къыйышып яшагъан. Юртлуларыны сююнчюнде ва къайгъысында пайлап алгъан. Бугюнлерде юртлулар оланы унутмай, оланы атына макътав сёзлени къызгъанмай, сагьатлар булан хабарламагъа гьазир.
Булай агьлюде тарбиялангъан Эмилия да ата — анасындан илгьам алып, яшавда оьз къысматын къургъан.
Эмилия ата юртундагъы о замангъы 8 класлыкъ школаны битдирип, кёп ойлашмай, ата — анасы йимик загьматгъа къуршала. Айтагъаным, Магьачкъала шагьарда Уьчюнчю Интернационалны атындагъы фабрикде загьмат ёлун башлай.
1987 — нчи йыл Эмилия Паша Пашаев деген улан булан уьйлене. Янгы къурулгъан агьлю Магьачкъаладан Эмилияны ата юртуна гёчюп, мекенлеше.
Эмилия 1982 — нчи йылдан башлап юртдагъы колхозда ишге къуршала. Колхозну емлер гьазирлейген цехинде ва башгъа тюрлю ерлерде загьмат тёге. Ол гьар — къайсы ишге терен ва
мекенли янашып, къарны — гёнгю булан тапшурулгъан ишни кютюп уьйренген тиштайпа.
Эмилияны оьмюр ёлдашы Паша да сав оьмюрюн машин гьайдавчу гьисапда йиберген, колхозда ва районну оьзге тюрлю идараларында да ишлеген.
Экисиде къайратлы загьматы учун «Загьматны ветераны» деген медаллагъа да ес болгъан.
Эр — къатын Пашаевлер 5 авлетни оьсдюрген. Оланы агьлюсюнде 4 улан ва бир къыз оьсген. Бугюнлерде авлетлери талайлы ожакълар къуруп, авлетлерин тарбиялайлар.
Эмилияны лап да уллу къызы Лидия Бабаюртда яшай. Уланы Виктор Бабаюртдагъы электросетни коллектевинде лап яхшы къуллукъчу деп санала.
Бу ерде эсгерме сюемен, Лидияны 3 уланы Ватанны якълавчусуну касбусун танглагъан. Олар — хас асгер гьаракатны ортакъчылары. Айтагъаным, Балабек, Артур ва Аскер, Россияны Савутлу
Гючлери булан дыгъар байлап, Ватаныны парахатлыгъын ва аманлыгъын сакълай.
Бугюнлерде Эмилия пенсиягъа чыгъып, уьйде ял ала. Яннавурунда яшав ёлдашы Паша ёгъу 8 йыллар бола. Амма буссагьатда да Эмилия дёрт де якъдан сююнч ва насип булан къуршалгъан. Ол кёп сююмлю ана ва уллана. Авлетлерини яшларындан сююне. Озокъда, юреги булан хас асгер гьаракатда ортакъчылыкъ этеген уланлары булан. Олагъа ва бары да Ватанны герти якълавчуларына алгъыш тилей, сав — саламат ожакъларына къайтмакъны ёрай.
Эмилия немис миллетни вакили буса да, къумукъ юртда оьсюп, ата — анасы йимик тап — таза бал татытып къумукъ тилде сёйлей.