Яш наслуну насигьатчысы

Бизин макъалабызны игити Илмухан Аббасовна Апаева да шолай ишден ялкъмайгъан, бары халкъгъа бир йимик янашагъан, исси, илиякълы, къатты хасиятлы, бек яхшы юрекли тиштайпа. Ол янгыз ювукъ адамларына тюгюл, бары да кёмек тарыкълагъа гьар заман да къол узатгъан ва узата. Илмухан Аббасовнаны яшаву да алда яшагъанланы къысматы йимик къыйын болгъан. Шогъар да къарамайлы, Илмухан къуватлы.

И.А. Апаева 1945- нчи йылда Туршунайда тувгъан. Шо йыллар халкъ учун бек къыйын болгъан: дав битген, бары зат тозулгъан, бузулгъан.

Шо тарчыкълы йылларда яшаса да, ол къайпанмагъан, оьр даражалагъа етишген. Илмухан Апаева 1966-нчы йылда Хасавюрт педагогика училищени битдирип, Бабаюрт эки номерли орта школагъа башлапгъы класларда дарс бермеге бакъдырылгъан. Онда узакъ заман ишлемеген, 1968-нчи йылда Бабаюрт ВЛКСМ-ни район комитетини бёлюгюню ёлбашчысы болуп ишлемеге башлагъан. Яхшы ишлейгенлер не ерде де талаплы. Шо саялы да Илмухан Апаеваны «Мол тюшюм учун» деген район газетни редакциясына адабият къуллукъчу этип чыгъара. Онда ол тогъуз йылны узагъында ишлей. 1981-нчи йылда Дзержинскийни атындагъы УОС–да баш инженер гьисапда загьмат ёлун башлай. 1988-нчи йылда буса къоркъунчсузлукъ техникасыны инженери болуп чыгъа.

Илмухан Апаева яш наслуну насигьатчысы да дюр. Ол кёп яшёрюмлени тюз ёллагъа салгъан, ишлемеге уьйретген. Яш наслугъа насигьатлар бере туруп, адам яшавуну оьзю къурагъанны, оьзюне ва айланадагъылагъа абурлу янашма тюшегенни, гьар инсан загьматы ва намусу булан халкъны абурун къазангъанны гьакъында кёп айта. 2017-нчи йылдан берли Илмухан Аббасовна пенсияда.

И.Апаеваны къайратлы загьматы гьукуматны янындан тергевсюз къалмагъан. Демек,1986-нчы йылда «Загьматны ветераны», 2004-нчю йылда «Россия Профсоюзгъа 100 йыл», 2007-нчи йылда «Дагъыстанны яшёрюмлерини насигьатчысы» деген медаллар, 1987- нчи йылда ДАССР–ни Оьр Советини Президиумуну, 2012-нчи йылда Дагъыстанны сайлав комиссиясыны Гьюрметлев Грамоталары, 2002-нчи йылда Россияны Госкомитетини белгиси булан савгъатлангъан.

Илмухан Апаевагъа къайратлы загьматы, районну оьсювюне этген къошуму саялы баракалла билдиребиз.

Илмухан Аббасовна булангъы лакъырлашывумдан мен оьмюрню пайдалы йиберген бусанг, яшав терен маъналы болагъанны англадым. Илмухан Аббасовна Апаеваны яшаву да терен маъналы деп гьисаплайман.