Яшавунда загьмат биринчи ерде токътагъан
Адам эс тапгъандокъ, ишлемеге, яшав гьалын яхшылашдырмагъа башлай. Биревлер кёп йылланы боюнда комбайнерлар, къойчулар, трактористлер болуп загьмат тёге, оьзгелер юрт хозяйствону оьзге тармакъларында уьстюнлюклеге етишелер. Шолай къайратлы кюйде загьмат тёгюп, районну юрт хозяйствосуну алдынлы тармагъына саналагъан чалтикчиликде янын салып ятмагъан загьматчыланы бириси — Нюрбике Байрамгьажиевна Маймакъова.
Нюрбике Маймакъова 1950-нчи йылда 5-нчи майда Къазанкъулакъ деген юртда тувгъан. 1958-нчи йылда биринчи класгъа баргъан, тек школаны тамамламагъа огъар насип болмагъан, неге тюгюл алтынчы класда охуйгъанда, ону атасы гечинген. Нюрбике Байрамгьажиевна авлетлени уллусу экенге, ол оьзюнден сонггъу яшланы аякъгъа тургъузмакъ учун анасына кёмек этмеге борчлу бола ва школаны къоя. Яшлар бираз эс тапгъанда, Н.Маймакъова колхозгъа ишлемеге бара. Ол чалтик чачагъан бригадада ишин башлай. Бара-бара ону бажырывлулугъу арта. Нюрбике Маймакъова къайратлы загьматы булан чалтик оьсдюрювчюлени ал сыдраларына чыгъа ва ону аты районгъа чы нечик де, савлай республикагъа белгили бола.
1970-нчи йылда В.И.Ленин тувгъанлы 100 йыл битегенликге байлавлу болуп, Нюрбике Маймакъова «Къайратлы загьматы учун» деген белгиге, 1971-нчи йылда «Къайратлы загьматы учун» деген медалгъа, 1976-нчы йылда Октябр инкъылапны ва 1982-нчи йылда В.И.Ленинни Орденлерине ес болгъан.
Бугюнлерде Нюрбике Байрамгьажиевна пенсияда. Ол кёп сюеген уланкъардашыны къызы булан яшай. Нюрбике Маймакъовагъа уллу чагъына етишгенде, гьажгъа бармагъа да насип болгъан. Биз Нюрбике Байрамгьажиевнагъа къатты савлукъ ва узакъ оьмюр ёрайбыз.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
