Хас асгер гьаракатны ортакъчысы Солтан

Ол 1997 — нчи йыл Янгы Хаса юртда Къурбан ва Айбике Иманмурзаевлени агьлюсюнде тувгъан эки уланны биринчиси. Школада билим алгъан сонг, Дербент шагьарда охуп, юрист касбугъа ес болгъан. 2017 — нчи йылда асгерге чакъырылгъан ва Москва областны Балашиха шагьарында Росгвардия бёлюкде эр намусун кютген.

Ондан къайтгъан сонг, Тюмень бойларда загьмат ёлун башлай. 2022 — нчи йылда уьлкеде гесекленген мобилизация чаралар башлангъанда, къолуна чакъырыв кагъыз алгъандокъ, шо мюгьлетде Нефтеюганск шагьардагъы военкоматгъа тезликде етишген. Агьлюсю Инсабатны ва бир йыллыкъ къызы Ханифаны да къоюп, хас дав гьаракатгъа гете. Экинчи гюнюнде огъар сююнч хабар геле. Уьюндегилер, 27 октябрде, Солтангъа улан тувгъанны ва огъар Эльмурза деп ат салгъанны билдирелер.

Солтан Иманмурзаев Донбасс бойларда Ватанын миллетчилерден ва бендеревчилерден азат этивде командованиеси алдына салгъан тапшурувланы ва буйрукъланы толу кюйде мекенли кюте.

Солтан Артемовск (Бахмут) шагьарны ювугъундагъы урушларда яраланып, Ростов шагьардагъы военный госпиталгъа тюше. Шо гюнден тутуп ол онда савлугъун беклешдире ва заман гетип, ону Екатеринбург шагьаргъа бакъдыра.

Эки операциядан сонг Солтан уьюне къайтгъан. Бирдагъы бир операция этилме герек экенге гёре, ол Санкт-Петербург шагьардагъы госпиталгъа бармагъа гьазирлене.

Юртлулары Солтан йимик уланлары баргъа оьктем болмагъа бола. Ол оьсюп гелеген яш наслугъа уьлгю болуп токътай.

Иниси Асхаб да агъасы булан оьктем бола. Ватанны алдындагъы борчун кютмеге гьазир. Солтан Иманмурзаевге къатты савлукъ ёрайбыз, ол эр намусун ахырына ерли кютежекге инанабыз.