Юртну башчысы хас асгер гьаракатда

Яшавда инсангъа оьз ёлун сайламагъа герек гезиклер бола. 2022 — нчи йылны сентябрь айында уьлкеде гесекленген мобилизация чаралар билдирилгенде, военкоматларда запасдагъы яшёрюмлени бир пайы хас асгер гьаракатгъа чакъырылып, Украина бойлагъа гетди.

Шо гюнлерде Геметёбе юрт администрацияны ёлбашчысы Къураш Гьажигишиев де биринчилерден болуп, оьз ёлун сайлап, юртлу уланлар булан хас асгер гьаракатда ортакъчылыкъ этмеге сюегенин ташдырып айтгъан. Ватаны чакъыргъанда парахат ва рагьат турма болмайгъан Къураш уллу болгъан ата — анасы, олжасы, авлетлери ва ювукъ адамлары булан савболлашып гёнгюллю кюйде хас дав гьаракатгъа гете.

Бизин яшавда гьар заманда къоччакълыкъгъа ва игитликге ер бар деп негьакъ айтылмай. Къураш Гьажигишиевни гьаракаты да шогъар шагьатлыкъ эте.

Юртлу уланланы хас асгер гьаракатгъа бакъдырып, оьзю юртда къалмагъа Къурашны намусу ва ягьы къабул этмеген.

Ол Геметёбе юртну башчысы болуп 2018 — нчи йылдан берли ишлей. Аз заманны ичинде яллыкъ билмейген улан юртлуланы абурун — сыйын къазанып бажара ва оланы яшавунда жанлы ортакъчылыгъын болдуруп, яшав шартларын енгиллешдирмек ва яхшылашдырмакъ учун гючюн салып чалышгъан.

Юртлуланы къыйынына — тынчына табулгъан, халкъы учун юреги авруйгъан ёлбашчы гьисапда ону кёплер таныгъан. Къайда ишлесе де, оьзюн аямай, ишине бютюнлей берилген гьаракатчы улан.

Къ. Гьажигишиев 1978 — нчи йыл 24 — нчю январда Геметёбе юртда загьматгъа берилген Къайтарны ва Чубаржатны агьлюсюнде тувгъан. Ол алты къызардашны бир уланкъардашы. Ата юртундагъы школада билим алгъан сонг, 1995 — нчи йыл Хасавюрт шагьардагъы педагогика колледжде охувун узатгъан. Физкультура дарслардан муаллимлер гьазирлейген бёлюкню оьр къыйматлар булан тамамлагъан.

Асгерге чакъырылып, Ватаныны алдындагъы эр намусун ким де сукъланардай кютген. Ата — анасына эки йылны узагъында Къураш къуллукъ этеген асгер бёлюкден бир — нече керен тизив ва низамлы улан тарбиялагъан саялы исси ва макътав сёзлер айтылгъан ва алгъышлар ёралгъан баракалла кагъызлар гелген.

Даимде оьзгелеге уьлгю болуп гелген улан, оьзюне тапшурулгъан ишин мекенли ва тындырыкълы этген. Асгерде де оьзюн яхшы яндан гёрсетмеге, патриот ругьда тарбиялангъан экенин малим этмеге бажаргъан.

Асгерден къайтып, Къураш Гьажигишиев билимлерин камиллешдирмек муратда, Дагъыстан пачалыкъ педагогика университетге охума тюше. Оьр охув ожакъны "Физкультура" факультетин тамамлай.

Бабаюртдагъы ДЮСШ — де яшланы кикбоксингден гьазирлейген тренер гьисапда чалышгъан. Къураш Гьажигишиев гьазирлеген яшлар спорт ярышларда гюч сынап, район, республика ва Россия оьлчевде уллу уьстюнлюклер ва оьрлюклер къазангъан, Россияны чемпионлары деген сыйлы атлагъа лайыкълы да болгъан.

Бир заманны ичинде Къураш Тюмен бойларда да загьмат тёкген. Амма гиччи Ватанындан, ана топурагъындан, халкъындан йыракъ туруп болмай, тезликде Дагъыстангъа къайтгъан.

Бойнуна алгъан ишине жаны — къаны булан янашагъан уланны гьаракатын ва жаваплылыгъын эс этип, ону Янгы Хаса юртдагъы школаны директору этип белгилей. Директорну борчларын кюте туруп, Къураш Гьажигишиев тренер ишинде ташламай. Юртлу яшланы спортгъа ва физкультурагъа къуршамагъа къасткъыла. Тарбиялавчулары гьар ярышдан алдынлы ерлер, кубоклар, дипломлар алып, тренерин сююндюре. Школада иш ёлдашлары, охувчу яшлар ва оланы ата — аналары огъар гьюрмет — сый булан янаша.

Янгы Хаса юртдагъы школада ону агьлю ёлдашы Нюржанат Магьамматовна да башлапгъы класланы муаллими болуп ишлеген. Уьч де авлети де бу школада охугъан.

Янгыхасалылар Къураш Гьажигишиевни атын гьалиде уллу абур булан эсгере.

- Къураш Къайтарович бизин школада 8 йыл ёлбашчы болуп чалышды. 2010 — нчу йылдан 2018 — нчи йылгъа ерли ону булан янаша ишлемеге магъа да насип болду. Ол гиччиге гиччи, уллугъа уллу болуп, гьар адам булан къыйышып, "ортакъ тил" табып болагъанны айрыча эсгермеге сюемен, — дей Янгы Хаса юртдагъы школаны завучу Гьайбат Шагьмуратова.

Алтын еринде яхшы деген бизин ата — бабаланы сыналгъан сёзлери бар. Булай бажарывлу уланны къайратлы гьаракаты тергевсюз къалмагъан, юртлулары Къураш Гьажигишиевге инамлыкъ билдирип, оьрде эсгерген кюйде, 2018 — нчи йылда ону Геметёбе юртну башчысы этип сайлай.

Къураш Гьажигишиев де юртлуланы инамлыгъын тас этмей, тезликде бютюнлей ишине бериле. Ону гьаракаты ва жанлы ортакъчылыгъы булан юртда кёп гёрмекли ишлер этиле.

Къураш Украина бойда Ватаныны аминлигин ва парахатлыгъын миллетчилерден къоруп сакълайгъанда, гиччи Ватанында уллу сагъынч ва сююв булан уьйде къалгъан ата — анасы, къызардашлары, олжасы ва авлетлери къаравуллай. Ону уллу къызы Аминат Черкесск шагьарда медицина институтда, Жаминат буса Орехово — Зуево шагьардагъы медицина колледжде охуй. Уланы Исмайылда школаны охувчусу.

Гетген йыл Къураш ата юртуна къысгъа болжалдагъы отпускагъа геле ва 22 ноябрде бир тавушдан юрт Советни депутатлары ону экинчи болжалгъа да администрацияны ёлбашчысы этип сайлай.

- Озокъда, шолай болмагъа да герек, неге тюгюл де Къураш Къайтарович йимик уланлар бизин юртларыбызны башында турса, бизин ишибиз тюзелип, алгъа баражакъгъа инанабыз, — дей Айзат Мусакъаева.

Ери гелгенде, Айзат бугюнлерде юртну башыны борчларын заманлыкъгъа кютегенни эсгермеге сюебиз.

Къураш Гьажигишиев Россия Федерацияны янгы къошулгъан регионларында биринчилерден болуп Ватанны якълавчусу гьисапда къоркъув билмей иш гёре. Дав тапшурувланы кютювде гёрсетген къоччакълыгъы саялы Центр дав округну командующийини буйругъуна гёре "За вклад в нашу Победу" деген медаль булан савгъатлангъан. Къураш ва ону асгер ёлдашлары хас асгер гьаракатдан уьстюнлюк къазанып гележекге биревде шеклик этмей. Ана Ватанына амин болуп, Къураш Гьажигишиев гёнгюллю кюйде Ватанын якъламагъа гетген оьзден улан. Булай уланланы гьар заманда бети ярыкъ болуп, уьстюнлюк къазанып, сав — саламат къаравуллап турагъан агьлюлерине къайтмагъа Аллагь насип этсин деп айтмагъа сюебиз.