Авлетлери булан оьктем болма гьакъы бар
«Ана» деген сыйлы атны юрютмеге тынч тюгюл. Солдатны анасы болмакъ буса, дагъы да къыйын. Неге тюгюл де, ана юрек гьаман да авлети булан. Эсде ёкъдан гелген телефонну зенгине, авлетини гьакъында ойлаша туруп гетген узакъ гечелер – шоланы барын да ол оьзюню юрегинден йибере. Авлетим сувукъму экен? Ачмы экен? Не гьалда экен? Шолай соравланы бугюн хас дав гьаракатда ортакъчылыкъ этеген бизин солдатланы аналары оьз-оьзюне гьар гюн бередир. Шолардан адил-янгыюртлу Дилбар Хасаева да артда къалмай. Ону эки де уланы – офицерлер. Хас дав гьаракатны отундан оьтген, Ватан чакъырса, бугюн де гене шо отгъа гирмеге гьазирлер. Неге тюгюл де, олар шо – «Ватанны якълавчусу» деген лап да сыйлы ва жаваплы касбуну сайлагъанлар.
Дилбар Хасаева 1961-нчи йылда Уллу Ватан давну ортакъчысы, хамаматюртлу Магьаммат Черивмурзаевни агьлюсюнде тувгъан. 1983-нчю йыл ерли школаны битдирген сонг, Дилбар Владимир шагьардагъы политихникалы институтда охувун узата. Юрт ерден йырыкъ шагьаргъа гетип билим алмагъа тынч болмай. Амма ол шо четимликлер уьстюн чыгъа ва 1988-нчи йыл оьр билимге ес бола.
Оьр билимли специалист анадаш районуна да тарыкъ бола ва шо йыл ол Бабаюртдагъы приборлар къурагъан заводда этилген малланы сан янын тергейген инженер болуп загьмат ёлун башлай.
Шо йылларда савлай Совет уьлкеде эшмеге башлагъан янгыртывну ели алатопангъа айлана ва шону гесеги Бабаюртгъа да етише. Айтагъаным, 90-нчы йылларда завод да тозула, онда ишлеген юзлер булангъы адамлар да ишсизлени сиягьын толтура. Дилбар да шоланы арасына къошула. Арадан кёп заман да гетмей, Дилбар адил-янгыюртлу Багьавдин Хасаев булан уьйлене, янгы агьлю янгы яшав башлай.
1992-нчи йылдан бу гюнге ерли Дилбар Хасаева Адил-Янгыюртдагъы орта школагъа загьмат дарсланы муаллими болуп чалыша, яшлагъа оьзюню дарсларында загьматгъа къуршалмагъа, жамиятгъа пайдалы болуп оьсмеге уьйрете.
Татывлу агьлюде эки улан ва бир къыз тува. Яшлар бой сала, гёз алда оьсе, шону булан йыллар да гете. Оланы эки де уланы Исмайыл ва Юнус школа чагъындан берли де спортгъа къуршалалар, гьар тюрлю ярышларда алдынлы ерлени алып юрюйлер.
Уллу уланы Исмайыл, 2010-нчу йылда Адил-Янгыюртдагъы орта школаны яхшы къыйматлагъа тамамлап, Новосибирск шагьардагъы Россияны МВД-сини ич асгерини институтуна тюше. 2016-нчы йылда эсгерилген оьр охув ожакъны уьстюнлю кюйде тамамлай ва яш офицер оьзюню аслу борчун – Ватанын якълавгъа гирише.
Украинаны топурагъында хас дав гьаракат башлангъанда, Россияны милли гвардиясыны капитаны Исмайыл Хасаев Донбасны халкъын миллетчилерден ва иблисчилерден азат этивде ортакъчылыкъ эте. Къоркъув билмейген офицер, Россияны Президенти Владимир Путинни Къарарына гёре, «Ватаныны алдындагъы лайыкълы къуллугъу» саялы деген орденни 2-нчи даражалы хынжаллы медалы булан савгъатлангъан.
Бугюнлерде Исмайыл Хасаев ёлбашчылыкъ этеген рота Саратов областны асгер бёлюклерини биринде ерлешген. Бугюн Ватан алгъа чакъырса, ол сесленмеге гьазир.
Ону иниси Юнус да, агъасыны артын таптап, ата юртундагъы школаны тамамлагъан сонг, 2016-нчы йылда агъасы охугъан Новосибирск шагьардагъы Россияны МВД-сини ич асгерини институтуна тюше. 2021-нчи йылда ол да офицер чинге ес болуп, ону тамамлай. Яш офицерни асгер бёлюкге белгилей. Узакъ заман да гетмей, белгили агьвалатлар башлана, Ватаныбызны алдында къоркъунчлукъ тува, ва уллатасы Магьаммат Черивмурзаевни ёлун узатып, Юнус да хас дав гьаракатгъа гете, Донбассны ва Запорож обсластны миллетчилерден тазалай, халкъгъа парахат яшав гелтирмеге къасткъыла. Юнус – старший лейтенант, ротаны командирин орунбасары.
Мен Исмайылны ва Юнусну уллатасы Магьаммат Черивмурзаевни эсгерип гетгеним де негьакъ тюгюл. Ол Уллу Ватан давну йылларында 3-нчю Украина фронтгъа гиреген 620-нчы атышыв полкда къуллукъ этген. Оьзюню дав ёлдашлары булан ол Витебск ва Вильнюс шагьарланы эркин этип, шону булан савлай Прибалтиканы немец-фашистлерден тазалагъан. Яралангъан, яралары сав болуп, гене дав ёлдашларыны янына къайтгъан ва Уллу Уьстюнлюкню уллу сююнч булан къаршылагъан.
Арадан 80 йыллар гетип, ону къызыны авлетлери де шо йылларда хытанына ерли юлкъунмагъан фашизм булан гене ябушувун узаталар. Уллатасы йимик олар да уьстюлюк булан сав-саламат уьйлерине къайтажакъгъа инаналар.
– Бизин учун Уьстюнлюкню гюню – гьаман да лап да уллу байрам. Атабыз болмаса да, биз шо гюн жыйылабыз ва байрам гюнню ону савунда йимик къаршылайбыз, -- деген эди 9 Майны гьакъында хабарлайгъанда Дилбар Хасаева гьалиден бир-нече йыллар алдын. Шо вакътиде, арадан бираз гетип, оьзюню эки де уланы: Исмайыл ва Юнус, атасы дав этген бойларда гене шо фашистлер булан ябушар деп ону эсине бир де гелмегендир.
«Мен уланларым булан оьктеммен, олар мени аркъа таявум. Гьали олагъа – бары да офицерлеге ва солдатлагъа савлай Ватаныбыз аркъа таягъан», -- дей бугюн буса офицерлени анасы Дилбар Хасаева.
Дилбар йимик нечесе аналаны ва аталаны авлетлери булан оьктем болмагъа гьакъы бар. Олар, яйны яллавунда гююп, къышны боранында уьшюп, явунгъа да, чарслы чакъгъа да къарамай, гьар гюн, гьар мюгьлет булан бизге гене уьстюнлюкню ювукълашдыралар. Бугюн хас дав гьаракатда ортакъчылыкъ этеген гьар ананы авлети – игит. Олар булан савлай халкъыбыз оьктем, оланы тапгъан ва тарбиялагъан аналаны алдында баш иймек буса – гьар ватандашны борчу!
Къоччакъ уланланы аналарын, етишип гелген къатынланы Халкъара гюню булан гьакъ юрекден къутлайбыз, олагъы савлукъ, чыдамлыкъ ёрайбыз.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
