Оьрлюклери яш наслугъа уьлгюдюр

Бугюнлерде Абидат Жамалдиновнагъа 65 йыл тамамланды. Ол оьмюрюню 37 йылын загьматгъа багъышлагъан.

Абидат Джамалдиновна Абасова 1956-нчы йылда 18-нчи февралда Бабаюртда Уллу Ватан давну ортакъчысы Жамалдин Алиевни агьлюсюнде тувгъан. Яш заманындан берли алдына салгъан мурадына етмейли токътамайгъан хасияты баргъа гёре, Абидат Абасова яшавунда кёп оьрлюклеге етген.

Абидат Джамалдиновна Бабаюртдагъы эки номерли орта школаны битдирип, Дагъыстан политех техникумуна охумагъа тюше. Ону тамамлап токътап къалмай, оьр билим алмакъ учун, Дагъыстан политех институтну яхшы къыйматлагъа битдире ва инженер — технолог касбугъа ес бола.

Загьмат ёлун Магьачкъаладагъы экмек биширеген заводда технолог болуп башлагъан, сонг дёрт номерли СПТУ-да муаллим ва комсомолну секретары болуп ишлеген.

Къайратлы иши булан загьматгъа чыныкъгъан А.Абасова 1983-нчю йылда райком комсомолну биринчи секретары этилип сайлангъан. Нечакъы къыставуллу болса да, Абидат Абасова комсомолда йиберген йылларын къысматы берген бир савгъат деп гьисаплай. Шо йылларда огъар къурумчулукъ гьюнерлерин гёрсетмеге имканлыкълар тувулунгъан ва янгыз Абидат Абасовагъа тюгюл, комсомолну бары да уьюрлерине яхшы яндан таъсир этген.

Ол билимлерин камиллешдирмек муратда 1984-1985-нчи йылларда Ставрополдагъы оьр комсомол школасында да охугъан.

Райком комсомолну Уставына гёре, яшёрюм чагъындан оьтгенлени гьар-бир ерге ишлемеге йиберегени саялы, Абидат Жамалдиновна да халкъ тергев Комитетини ёлбашчысы этип белгилене ва онда дёрт йыл ишлеген сонг, партияны район комитетини секретары этилип сайлана. Шо заманда, А.Абасова Ростовдагъы оьр партия школасына охумагъа йибериле. Эсгерилген школаны оьр къыйматлагъа битдирген сонг, ол политолог касбугъа ес бола.

Партияны район комитети тозулгъан сонг, гьар тюрлю йылларда Абидат Жамалдиновна Бабаюртдагъы бишлакъ комбинатны, халкъны жамият якъдан таъмин этеген Центрыны ёлбашчыларыны орунбасары болуп загьмат тёкген.

Абидат Абасова йигирма беш йылдан да артыкъ тиштайпаланы район Советини ёлбашчысы болгъан, республика Советини уьюрю болуп да сайлангъан. Оьзю йимик къатынланы къыйынлыкъларына сесленип, ол кёп аналагъа кёмек этген ва нечесе ожакълагъа къолун узатгъан.

2001-нчи йылда Абидат Жамалдиновна район администрацияны ишлерин юрютеген Управлениени ёлбашчысы болуп загьмат ёлун узата. Онда етти йыл ишлеген сонг, 2008-нчи йылда «Бабаюртну янгылыкълары» деген район газетге баш редактор этилип белгилене. Шо йылларда Абидат Жамалдиновна оьзюню мухбир пагьмусун да ача. Баш редактор болуп ишлеген чакъы заманны ичинде, Абидат Жамалдиновна иш ёлдашларын бирикдирмеге, олагъа оьзюн сюйдюртмеге бажаргъан. Ону редактор болуп геливю булан район газетни бетлери айрыча ренк алгъан. Халкъарада газетни абуру гётерилген, кёп ватандашлар газетге язылгъан ва редакторну гьакъында йылы сёзлер айтгъан.

Абидат Жамалдиновна район Советини халкъ депутаты болуп беш керен сайлангъан, халкъ Съездини делегаты да болгъан. Оьзюню къайратлы загьматы учун, 1986-нчы йыл СССР-ни Оьр Советини Президиумуну Къарарына гёре «Загьмат уьстюнлюгю учун» деген медал, СССР-ни юрт хозяйствосуну артдырывда этген къошуму саялы ВДНХ-ны Баш комитетини ез медалы, ондан къайры да, ЦК ВЛКСМ–ни Гьюрметлев грамотасы ва айры–айры ведомстволаны грамотлары булан савгъатлангъан.

2016-нчи йылны январь айындан берли Абидат Жамалдиновна ял алывда. Ол пенсияда буса да, бош олтуруп, заманын йибермей, районну жамият яшавунда да ортакъчылыкъ эте. Яш наслулагъа насигьатлар бере, болагъан кёмегин этмеге къасткъыла, неге тюгюл бугюнгю яшёрюмлени гьалы ону бек талчыкъдыра.

Абидат Жамалдиновна йимик ишине, районуна, юртуна юреги авруп янашагъанлар кёп аз. Ол даим де районну оьрге гётерип юрюгенлени бириси. Район оьлчевюнде ва ондан тышда ишлесе де, Абидат Абасова бир де оьзюн оьр тутмагъан, гьар заман да халкъ булан янаша болгъан, бажарылагъан кюйде оланы яшав масъалаларын чечме кёмек этген.

Нечакъы къатты хасиятлы болса да, Абидат Жамалдиновна — юреги бек исси, яхшы адам. Шолай анасы бары яшларына яшавда бир уллу байлыкъ деп эсиме геле. Ону авлетлери ва авлетлерини авлетлери оьтесиз бек сюе, неге тюгюл гьар не къайгъысы, масъаласы болса да, Абидат Жамалдиновна йылы сёйлеп, тюз ёллагъа салып бажара.

Биз Абидат Жамалдиновна Абасованы тувгъан гюню булан къутлайбыз, огъар инг башлап къатты савлукъ, узакъ оьмюр, яшавунда, яшларыны къыйынлыкъларын да гёрмейли, сююнюп яшамакъны ёрайбыз.