Фельдшер касбусуна амин Гьабсат

Айтагъаным, гиччи къызъяш акъ халат да гийип, «мен докторман» деп къурчакъларын тизип, олагъа «укол» этип, оьзюню гележегин гёре болгъан. Ол уллу болуп, юрегине тутгъан мурадына да ете.

Гьабсат 1981 — нчи йыл Рашитханны ва Асилханны агьлюсюнде тувгъан. Ата юрту Тамазатёбе орта школаны битдирип, 1998 — нчи йыл Гьабсат Къызлар шагьардагъы медицина училищеге охума тюше. 2001 — нчи йылда эсгерилген хас орта ожакъны фельдшерлер гьазирлейген бёлюгюн тамамлап, Янгы Хаса юртдагъы больницада медсестра болуп ишлей. Бир йылдан сонг Тотаюрт больницада «Скорая помощь» машинге фельдшер болуп тюше ва бугюнлеге ерли загьмат ёлун давам эте.

Шо йылланы боюнда Гьабсат кёп адамгъа къолундан гелеген кёмегин этген. Касбу бажарывлулугъу, ишине жаваплы янашыву Гьабсатгъа бойнуна алгъан борчларын кютмеге болушлукъ эте.

Ол — оьзюню ишин яхшы билеген, касбусунда кёп сюеген арымай - талмайлы чалышагъан бай сынав топлагъан медицина къуллукъчу.

Гьабсат Байсайитова кёп санавдагъы Гьюрметлев грамоталагъа ва баракалла кагъызлагъа лайыкълы болгъан. Амма, барыда савгъатлардан алда огъар аврувланы баракалласы ва разилиги. Олай гезиклер буса ону загьмат ёлунда кёп болгъан.

Ишигизде лап да эсде къалагъан агьвалат болгъанму деген соравума Гьабсат булай жавап берди:

- 2008 — нчи йылда Гьамзаюртну къырыйында эки машин бир-бирине бетге бет урунуп, уллу хатарбалагь болду. Шо аварияда экиде машиндеги 6 адам оьлдю. Машинни ичиндеги эки уланъяш яраланып табулду. Олагъа 6 ва 8 йыл бола эди. Мен шо заман тезликде оланы район больницагъа элтмеге къасткъылдым. Ёлну узагъында яшлагъа герекли биринчи медицина кёмекни болдурдум. Олагъа къарап, оьзлюгюнден гёзьяшларым тёгюле эди. Яшланы савлай больницагъа етишдиргениме сююндюм. Шо мюгьлетде яшавда касбумну тюз танглагъанман деп ой гелди. Гиччипавланы ажжалны къучагъындан чыгъарып алгъандай болдум. Гьар медицина къуллукъчугъа ондан уллу насип бармы?!

Гьабсат Байсайитова оьлюмден къутгъаргъан яшлар бугюнлерде Кочубей поселокда тура. Агъа — ини Гьажимурат ва Магьаммат Гьабсатны унутмай, ону булан гьали де байлавлукъ тута.

Савлукъ сакълав тармакъда Гьабсатны агьлюсю Муратда ишлей. Ол «Скорая помощь» машинни гьайдавчусу болуп загьмат тёге. Оланы авлетлери де врач касбуну танглап, бугюнлерде Волгоград шагьардагъы медицина университетде, уланы Къураш 3 — нчю курсда, къызы Женнет буса 1 — нчи курсда охуйлар. Гезиги гелгенде эсгерме сюемен, гелини Аза да шо охув ожакъда охуй.

Савлукъ сакълав тармакъда чалышгъан Гьабсатгъа ва ону агьлюсюне ишинде даим де аврувланы баракалласын ва гёнгюн алып юрюмеге гьакъ юрекден ёрап, къыйын ва герекли ишинде оьрлюклер ва уьстюнлюклер кёп болсун деп айтмагъа сюебиз.