Юрт хозяйство тармакъны уьлгюлю загьматчысы

Адам оьз къысматында ерин тапмакъ — чинк биринчилей, бир саниятны устасы болмакъдыр. Бизин юртлу Гьюсейин Арсланалиевге тракторист касбу яшавуну кюрчюсю болуп токътагъан.

Эдепли, загьматны кёп сюеген, белгилиликни излемейген Гьюсейин, бир де этген иши булан макътанмагъан.

Гьюсейин Арсланалиев 1954-нчю йыл декабр айны 22-синде Бабаюртда колхозчу Умавну агьлюсюнде тувгъан. Ону уягьлюсю загьматчылардан болгъан ва авлетлерине гиччиден тутуп загьматгъа сюювню сингдирген. Гьюсейин 1961-нчи йыл ата юртундагъы эки номерли орта школаны биринчи класына баргъан.

8 класны битдирип, ол 1969-нчу йылда Бабаюртдагъы юрт профессионал училищесине охума тюше. 1970-нчи йылда ону тамамлап, Гьюсейин Арсланалиев «Дагъыстан» совхозгъа тракторист болуп тюше. Загьмат ёлуну биринчи гюнюнден тутуп ол оьзюню ишин бек ушата, намуслу кюйде чалыша. Онда ишлеп турагъан вакътисинде Гь. Арсланалиевни асгерге чакъыра. Ол 1973-1975-нчи йылларда асгерде къуллукъ эте. Ватанына борчун кютюп, ата юртуна къайта, оьзюню «темир» къурдашы булан загьматын давам эте.

1977-нчи йылда Гьюсейин Умавович совхоздан тайып, «Юрт хозяйство техника» деген къурумгъа КА-700 тракторну гьайдав- чусу болуп геле.

Эсгерилген къурумлар, идаралар бузулуп башлагъанда, 1993-нчю йылда Гьюсейин ёл ремонт къурулуш Управлениеге ишге чыгъа. Шондан да пенсиягъа да гете. Амма ол уьйде олтуруп турмай. Буссагьатгъы вакътиде де Гьюсейин эсгерилген къурумда къаравулчу болуп ишлей. Ол къайсы коллективде де иш ёлдашларыны арасында абур-сый къазангъан.

Гь. Арсланалиев тёкген къыйынлар гьар заманда да белгиленген. Огъар район ва республика оьлчевюнде кёп санавда Гьюрметлев Грамоталар тапшурулгъан, акъча савгъатлар да берилген, социалист загьматны уьлгюлюсю деп, Гьюрметлев тахтагъа сураты да илинген.

Гьюсейинни къысмат яшав ёлунда, иш уьстюнде къаттылыгъын, ана топу- рагъына аминлигин аз сынамагъан. Не болса да ол оьзюню кёп сюеген касбусунда къайратлы загьмат тёкгенге бир де гьёкюнмеген. Герти айтыла экен, адам оьзю кёп сюеген ишинде ишлесе, арыгъанлыкъны гьис этмей деп. Шо кююнде Гьюсейин Арсланалиев де гечелер ай ярыкъда чалышса да, талгъанлыкъ не экенни билмеген.

Айтылгъан загьматчыдан къайры да, Гьюсейин — абурлу ата ва уллата. Ол 1976-нчы йылда къазмалы гёзел къыз Умукюрсюн булан уьйленген, алтындай 2 къыз ва 2 уланны тарбиялап тюз ёллагъа салгъанлар. Авлетлери де яшавда оьз ерин табып, ожакъ къургъанлар.

Оланы яшлары тарбиялы болмакълыгъыны себеби — ата-анасындан гелген варислик. Гьюсейинни яшлары, оланы авлетлери ва олардан тувгъанлары да ону эпсиз бек сюелер ва олай гьюрметли атасы баргъа оьктем болалар.