Агьлюсю оланы байлыгъы ва сююнчю

Олар 1975 — нчи йылда уьйленип, уьй — эшик къургъан. Гьажи Янгы Хаса юртда, Ибадат буса Мужукъай юртда тувгъан. Бирче яшавун жагьил агьлю Янгы Хаса юртда башласа да, эки йылдан сонг Татаюртгъа гёчелер ва совхозда гьар тюрлю тармакъда загьмат тёгелер. Гьажи бир вакътини ичинде МЖС къурумда, Ибадат буса совхозну фермасында савунчу болуп, сонгъа таба овощлар болдурагъан бригадада ишлеген.
Къайда ишлесе де, олар оьзлени бойнуна алгъан борчларына уьстенсув янашмай, мекенли ва тындырыкълы кютген. Ким де сукъланардай татывлу агьлю къуруп, дёрт яшны оьсдюрген ва гиччиден ана топуракъгъа, юрт загьматгъа сюювню сингдирмеге къасткъылгъан, пайдалы насигьатлар берип, тюз ёлларда тарбиялагъан.
Гьажини ва Ибадатны ожагъына къонакълар кёп геле. Ожакъда очакъны отун сёнме къоймайгъан олжа, ана ва уллана Ибадат гелгенлеге къашын да, ашын да берип болагъан илиякълы тиштайпа.
Агьлюде оьсген уланлары Сангьажи, Жамал, Камал ва къызы Зайнап яшавда оьз насибин табып, ата — анадан уьлгю алып, оьзлерде татывлу ожакълар къургъан.
Уллу уланы Сангьажи 1977 — нчи йылда тувгъан. Бугюнлерде Тюмен бойларда, агьлюсю Зайира буса Тотаюртдагъы школада муаллим болуп ишлей. Агьлюде 3 авлет оьсген ва тарбиялангъан.
Уланы Темирсолтан ва къызы Зугьарият охуп, касбулагъа ес болуп, йыракъ Тюмен бойларда ишлей. Лап да гиччи къызы Зиярат школада охуй.
Гьажини ва Ибадатны экинчи уланы Жамал 1980 — нчи йылда тувгъан. Ол агъасы йимик Тюмен бойларда, агьлюсю Аривхан буса ашбазны кёмекчиси болуп Тотаюртдагъы «Ласточка» деген ясли — бавда ишлейлер. Оланы татывлу агьлюсюнде 3 улан оьсе.
Гьажини ва Ибадатны уьчюнчю уланы Камал 1986 — нчы йылда тувгъан. Хасавюрт шагьардагъы педагогика колледжни тамамлап, физкультура дарсланы муаллими болуп Тотаюрт школада загьмат тёге. Агьлюсю Жамиля булан уьч авлетни оьсдюре.
Къызы Зайнап 1991 — нчи йылда тувгъан. Бугюнлерде ата юртундагъы больницада медсестра болуп чалыша. Агьлю ёлдашы булан уьч авлетни оьсдюре.
Гьажи ва Ибадат яшларыны 12 авлетинден сююнюп яшай.
Бу ерде эсгерме сюемен, юртлулар Гьажиге атын айтмай, абур-сый этип Агъав дейлер.
Буланы яшавундагъы уллу байлыгъы ва сююнчю — оланы агьлюсю.