Загьмат ёлу яш наслугъа уьлгю эди

Ш. Жумакъазиева 1935-нчи йыл Тамазатёбеде юртда тувгъан. Онда орта билим береген школа ёкъгъа гёре, 1953- нчю йылда ол Бабаюрт- дагъы орта школаны тамамлай.
Оьр билимлеге гьасирет къыз, шо йыл Магьачкъала шагьардагъы пачалыкъ пединститутгъа тюше ва оьр къыйматлар булан рус тил ва литература бёлюгюн битдире.
Юртлу къызланы арасында би- ринчилерден болуп оьр билимге ес болгъан Шихайбат, башлапгъы загьмат ёлун, ата юрту Тамазатёбедеги сегиз йыллыкъ школада рус тилден дарс береген муаллим болуп башлай. Сонг ол Хамаматюрт школада, арадан заман гетип буса Хасавюрт РайОНО-да методист болуп да ишлей.
Шихайбат Къурашевнаны къысмат айлана дагъы районгъа гелтире ва ол Бабаюртдагъы 11 номерли школа-интернат касбусуна гёре загьматын давам эте.
О вакътилерде школада кёбюсю гёчювюл гьайванчылыкъны хозяйстволарында яшайгъан агьлюлени яшлары билим ала эди. Онда ишлеген чакъы заманны арасында, 20 йыл ол директорну охув-тарбиялав ишлерине къарайгъан орунбасары болуп чалыша. Школаны партия къурумуну председатели, «Билим» деген жамият къурумну уьюрю болуп да ол, кёп жамият ишлерде де актив ортакъчылыкъ этген, партконференцияланы, Дагъыстанны къатынларыны ва муаллимлерини съездлерини делегаты да болгъан. Ш.Жумакъазиевагъа кёп яшав толкъунлардан оьтме тюше. Тек ол кант этип, къысматына хатири къалмагъан. Къыйынлыкълагъа чул бермей яшлагъа билим беривде ва тарбиялавда къайратлы загьматгъа синге.
Ш.Жумакъазиева ишлеген коллективде ёлдашларыны арасында, охутгъан яшланы ата-аналарыны янындан да абур–сый булан пайдалана.
Ишде гёрсетген уьстюнлюклери учун Шихайбат Къурашевна Минпросну, Бабаюрт район комитетни, РПК-ни янындан Гьюрметлев грамоталар, Баракалла кагъызлар, В. И. Ленин тувгъанлы 100 йыл тамамланагъангъа байлавлу болуп, къайратлы загьматы учун юбилей медаль булан да савгъатлангъан.
Ш. Жумакъазиева халкъына, элине 50 йыл къуллукъ этип, нечесе яш наслуну тарбиялап, тюз ёллагъа салгъан. Оланы арасында янгыз Дагъыстанда тюгюл, ондан тышда да, оьрлюклеге етип, гьар тюрлю тармакъларда ишлейгенлери де бар.
Ол яшав ва загьмат къыйынлыкълагъа къарамай, авлетлерине оьр билимлер де берген. Уланы Бозигит механик-мелиоратор касбугъа ес болгъан, къызы Эльмира колледжде ингилис тиллени муаллими болуп ишлей.
Бугюнлерде Шихайбат Къурашевна Жумакъазиева бизин арабызда ёкъ. Ол 2004-нчю йылны
июн айыны 9-нда узакъ аврувдан сонг гечинди. Амма, ону ярыкъ келпети, яш наслуну тарбиялавда ва билим беривде этген яхшы ишлери ол охутгъан охувчуланы ва таныгъанланы эсинден бирде таймажакъ.

Макъала булан бирге, Яраш Жумакъазиевни гечинген къызардашы Шихайбатны 24 йыл алда болгъан юбилейине багъышлангъан шиърусун да печать этебиз.

Къызашыма

Ажайып бек, Къызаш, сени сюемен,
Ёкъдур дагъы шулай сюйген эркъардаш.
Гьакъ юрекден сыйлы сёзлерим булан,
Юбилейинг мен къутлайман, къызардаш.

Яшав ёлунг гьар-бир янын суратлап,
Кёп затланы эсгермеге сюемен.
Бу гюнюбюз гёрмегенге уллулар,
Аз буса да талчыгъаман, гюемен.

Биз экибиз янгыз къалдыкъ абзарда,
Атабызны Ватан даву алгъанда.
Насибибиз Дадавубуз болгъаны,
Кёп къыйынлар тёкдю бизге савунда.

Эки де ана, атабызны агъасы,
Хыйлы йыллар тарбиялап оьсдюрдю.
Гене гёнгюн аларбыз деп тургъанда,
Яратгъаным оланы да кёп гёрдю.

Яшав шолай – бар зат тюгюл даимге,
Бир инсанда огъар пуршавлукъ этмей.
Биз сюедик олар булан болмагъа,
Не этсек де бизге уллулар етмей.

Эсимде бар 43 йыллар алъякъда,
Эки къызьяш (1) оьр билимлер алгъаны.

Юртдагъы шо гьайран ишни исбатлап,
Солтан агъав (2) вечер этип болгъаны.

Мактап булан, тарбиялав иш булан,

Йыллар гетди арты-артына тагъылып.
Сокъмагъыбыз яш наслугъа биз салгъан,
Гетип бара оьзен йимик агъылып.

Тек бусада ишлесек де белсенип,
Оьмюрюбюз яшлар булан гетсе де.
Уллу чынлар, ат къазангъан болмадыкъ,
Бары да халкъ пагьмубузну гёрсе де.

Шюкюрлюк эт къарап эки янынга,
Яшав ёлунг бир де гьёкюнч болмажакъ.
Парахат бол гьалал загьматынг булан –
«Гюллейгенлер» юрек аврув табажакъ.

Дюрсен, Къызаш, сёнмейген гёз ярыгъым,
Уллу насип магъа сени барлыгъынг.
Шатлыкъ булан даимге узакъ яша,
Сен сав чакъы гюнлер гете тамаша…

Мени учун къызгъанмайгъан гьеч бир зат,
Къызашым, сен барлыгъынга оьктеммен.
Ярыгъында сав дюньяны яшайгъан,
Сююнемен, иржаяман, кюлеймен.

Къызардашым, бек аявлу Къызашым,
Айып этме сатырлагъа, йырыма.
Парахат бол, гьаман абур этежек,
Ожагъымда яшайгъанлар бары да.

Мендеги шо сагъа бакъгъан сюювюм,
Ачыкъ юзюм, таза юрек байлыгъым.
Тарыкъ буса къап-къабулман бермеге,
Сени учун къурбан этип яшавум.

Къой, къайырмас, агъылагъан гёзьяшлар,
Сююнчлюкню зем-зем булагъы болсун.
Гьеч бирдокъ да къайгъы гюнлени гёрмей,
Уьй-абзарынг даим шатлыкъдан толсун!

Кёп миллетни авлетлерин охутуп,

Адам этдинг, яшав ёлуна салдынг.

Хыйлыларын терс ёллардан къутгъарып,

Дос-къардашны разилигин къазандынг.

1.Шихайбат, Къыстаман
2.Солтан агъав – давну ортакъчысы, меценат