Мен террорчулукъгъа къаршыман
Анжела Магьмутова,
Бабаюртдагъы Б.Сатыбаловну атындагъы орта школаны 9 «б» класыны охувчусу
Террорист буса — таш юрекли адам. Ону оюнда – кёп адамны оьлтюрмек, оьзюне халкъны тергевюн тартмакъ. Шолай террористлер гьали-гьалилерде бизин Ватанны тахшагьары Москвада вагьши кюйде бир гюнагьсыз адамланы яшавун къыркъды. Ахшам чакъда ял алайыкъ деп концертге гелгенлени хыйлысы оьлдю, сав къалгъанларыны буса о къыямат гюн бир де эсинден таймажакъ.
Террористлер гирип, бир затгъа да, яшгъа-уллугъа къарамайлы атышып башлагъанда, ажжал етмегенлерине къачып къутулмагъа бажарылды, тек кёбюсюне дюньяны ярыгъы сёндю. Къачып яшынгъанланы бирлери яманлар салгъан отну тютюнюне бувулуп оьлдю. Телевизоргъа къарайгъанда, мен гёзьяшларымны токътатып болмай эдим. Анасы-баласы бир-бирин къучакълагъан кюйде, анасы къалып, яшлары оьлгенлер бар эди. О гиччинев сабийлени не гюнагьы бар, оланы оьлтюрмеге янгыз юрексиз адамны къолу гётерилежек.
Жыйылгъанланы арасында оьзлени яшавуну гьакъында ойлашмайлы, кёмекге чапгъанлар кёп бар. Шоланы арасындан мен узбек улан Ислам Халиловну эсгермеге сюемен. Оьзюне 15 йыл бола буса да, ол бек уллу къоччакълыкъ гёрсетген. Юзден де артыкъ адамны башгъа эшиклерден чыгъарып, болмайгъанларына кёмек этип, къутгъармагъа бажаргъан.
Террористлени миллети таджик деп эсгериле. Тек мен айтмагъа сюеген бир зат – яман миллетлер ёкъ, гьар миллетде яман адамлар бар.
Ислам Халилов йимик онда жагьиллер дагъы да бир-нече болгъан. Олар барысы да игит кюйде айланып, халкъгъа эпсиз кёмек этгенлер. Мени чагъымдагъы батырлагъа мен оьзюмню баракалламны билдирмеге сюемен. Шолай къоччакълар булан бизин Россия оьктем бола.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
