Ёкъ болсун террорчулукъ

Бары халкъ ахшам чакъда ял алмакъ учун, бирлери савлай агьлюлери, башгъалары гиччи яшлары булан концерге гелген болгъан. Биревню де оюна да гелмейген иш болду. Бир якъдан да къаравулламайгъан къоркъунчлукъ тувулунду. Бирден-эки залны эшиклери ачылып, рагьатланып турагъан адамлагъа тувра атышып башлагъанда, халкъны арасында къувун тюшюп гетди. Олар барысы да яшынма ер излеп башладылар. Алдагъыланы оьлтюреген вакътиде, артдагъылагъа башгъа эшиклерден чыкъмагъа бажарылгъан. Бирлери ер-ерге гирип, пысып токътагъанлар, тек олар учун о яшынгъан ерлер оьлюм гелген ерлер болуп чыкъды, неге тюгюл террористлер оьзлер гетегенде от салып гетгенлер. Яшынгъан чакъы халкъ тютюнге тунчугъуп оьлгенлер. Телевизордан шоланы гьакъында айтагъанда, мени юрегим ачыта эди. Мени башыма шулай ойлар гелди: нечик инсан оьзю йимик адамгъа савут гёзлеп, ягьын акъчагъа сатып бола экен. Шолайланы асып оьлтюрсе де, кёп тюгюл.

Озокъда, о террорчулукъ болгъан гюн, кёмекге чапгъанлар кёп болгъан. Олар оьзлени яшавуну гьакъында ойламайлы, хыйлы адамны къутгъаргъан. Шоланы арасындан мен дагъыстанлы Муса деген эргишини эсгермеге сюемен. Ону янында сакъат яшы да булан атасы болгъан. Олар яшыны коляскасын теберип чыгъарма болмай турагъанда, Муса о уланны аркъасына да гётерип, залдан чыгъарып, къоркъунчлукъ ёкъ ерге элтген. Ол онда оьзюн эсгерсин, сыйласын деп къаравулламагъан. Мусаны артда сакъат уланны ата-анасы излеп табып, баракалла билдиргенлер. Рагьмулу юреги булангъы рагьмулу бу улан да, шону чагъындагъы къызгъанмай адамланы оьлтюрмеге гелген яракъсызлар да бир-бирине толу кюйде къаршы гелелер. Мен Муса йимик, 15-йыллыкъ Ислам йимик къоччакъланы алдында баш иемен.