Аслу ёлугъув оьтгерилди
Артдагъы агьвалатлагъа гёре, гьар шагьарда, гьар юртда игитлени сыдралары арта бара. Олар гьариси Ватаныны алдында оьз борчун кютюп, аминли болуп, Украина булангъы дазуда юрюлеген хас дав гьаракатгъа гетип, оьзлени къоччакълыгъын гёрсетелер. Районну бары да юртларыны олай батырлары бар десек дурус болур.
Олар оьсюп гелеген яш наслугъа уьлгю болуп токътайгъанны унутмай, Ватанны якълаву учун этеген къошумлукъну эсде сакълама герекбиз.
Бабаюртдагъы эки номерли орта школаны муаллимлери шо агьвалатлагъа байлавлу болуп, Россияны янгы къошулгъан регионларын азат этивде яраланып къайтгъан Завурбек Качетов ва Ринат Исмаиловну охувчулар булангъы ёлугъувгъа чакъырды.
Ондан къайры да, хас дав гьаракатда алдынгъы сыдралардагъы боецлени ата-анасы да чакъырылгьан эди. Охувчулар гиччирек концерт гёрсетген сонг, хас дав гьаракатдагъы Артур Териковну атасы Рамазангъа сёз берилди. Ол яшлагъа: «Бугюн юрюлюп турагъан хас дав гьаракат бизин уьлкеге де тийип бола. Шо гьалланы англап, мени уланым бир мюгьлет де ойлашмайлы гёнгюллю кюйде хас дав гьаракатгъа халкъны неонацистлерден якълама гетген. Озокьда, авлетин йиберип, артындан къарамагъа тынч тюгюл, буса да мен уланым этген ишге бек разимен», — деди.
Сонг да Хадижат Жаватхановагъа сёз берилди. Ол бек тарлыгъып, уланы булан оьктем болагъаны гьакъында айта туруп, дюньядагъы бары халкъгъа парахатлыкъ ёрады.
Къонакълыкъгъа гелген игитлер асгер борчун кютмек учун этген оьз къошумуну гьакъындагъы хабарларына жыйылгъанлар бек тамаша кюйде тынгладылар. Муаллимлер тарланып, оьзлюгюнден гёзьяшлары агъа эди, неге тюгюл Украинадагъы хас дав гьаракат юрюлегенден берли онда гьар агьлюден авлети, уланкъардашы, атасы, эри яда оьзге къардашлары гетмеген ожакъ ёкъ. Шо саялы да буссагьатда да юрюлеген хас дав гьаракат тамамланажакъ гюнню бары да халкъ къаравуллай.
Юртгъа къайтып, Ринат бираз замандан янгыдан ёлдашларыны янына гетди, Завурбекге буса гетмеге бажарылмай, неге тюгюл къатыны хапарсыздан гечинген ва гиччи къызы янгыз къала.
Муаллимлер гелгенлеге савлукь, тез арада парахатлыкъ болмакъны ёрады.
Бу аслу ёлугъувну рус тилден дарс береген муаллим Наида Жамалиева ва директорну тарбия якъдан орунбасары Мадина Манапова онгаргъан эдилер. Жыйылгъанлар олагъа гьакъ юрекден баракалла билдирди.
Тез заманны ичинде шо хас дав гьаракат да битип, гьар ожакъдан гетген эргишилер уьйлерине сююнюп къайтажакъ деп умут этебиз.
Дюньяда парахатлыкь болсун, алам шатлыкьдан толсун.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
