Терроризмге къаршылыкъ билдиребиз
Москва областны Красногорск шагьарында бу йылны март айыны 22 – синде болгъан къайгъылы агьвалатлар районну халкъын къазапландырмай болмады. Тамазатёбелилер де «Крокус Сити Холл» деген концерт бинада болгъан вагьши ва намарт ишге байлавлу оьзлени пикруларын айтды.
Абдулгьамит Абдулгьамитов, пенсияда ял ала.
-Мен кёп йылланы боюнда юртда имам болуп ишледим. Бусурманланы ва ислам дин булан бу вагьшиликни ва намартлыкъны бир аралыгъы да ёкъ деп къатты кюйде ташдырып айтмагъа сюемен. Ислам динде адамны жанын къыркъмакъ бир де гечилмейген гюнагь деп санала. Яратгъаныбыз бизге азыкъ да, яшав да бере. Жан салагъанда, жан алагъанда ону ихтиярында. Ислам динде бир адамны оьлтюрюв сав дюнья оьлчевде адам оьлтюрювге тенг бола.
Оьзюгюз ойлашып къарагъыз, бир гюнагьсыз къатынлар — яшлар, къартлар шо гюн террорчуланы къолундан намарт кюйде оьлюп гетди. Бирлери савутну гюллесинден, бирлери яллайгъан бинада агъуланып жаны къыйылды, кёплери яраланып ва агъуланып азарханалагъа тюшдюлер. Бусурманланы сыйлы айы деп саналагъан Рамазан айда, оьзю де гьар бусурмангъа сыйлы жумагюн этилген жиянатчы ва террор ишге юреклерибиз ачытды, бавурубуз гюйдю. Террористлени ва жиянатчыланы дини де, миллети де, тюзюн айтса, олай тайпаланы Аллагьы да ёкъ.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
