Берекетли сыкълашгъан ожакъ къургъан

Агьлюню башы Пахурдин 1950 - нчи йыл Янгы Хаса юртда Айнудинни ва Абашны агьлюсюнде тувгъан. Ата юртундагъы 8 йыллыкъ школаны битдирип, 9-10-нчу класны хоншудагъы Тамазатёбе юртдагъы орта школада тамамлагъан.
1972-нчи йыл Магьачкъала шагьарда юрт хозяйство техникумну охуп битдирген. 1975 — нчи йыл агьлюсю булан Къазахстангъа гетген ва о замангъы Новый Узень деген шагьарда мекенлешип, яшав къургъан. Пахурдин нап ахтарагъан къурумларда ишлеген.
Пахурдинни агьлю чери Дина Моллакъаевна да 1950 — нчи йыл Оразгъулавулда тувгъан. 1970 — нчи йыл Буйнакск шагьардагъы муаллимлер гьазирлейген училищени битдирип, ата юртундагъы школада башлапгъы класланы муаллими болуп иш ёлун башлай. Сонг Новый Узень шагьарда яшайгъанда, яшлар бавуну тарбиялавчусу болуп загьматгъа къуршалгъан.
Алтын еринде яхшы деп ата — бабаларыбыз да айтгъанлай, олар 1983 - нчю йыл ата юртуна къайта.
Пахурдин пенсия чагъына етишгенче юртдагъы балыкъ цехде загьмат тёкген. Оьмюр ёлдашы Дина да бугюнлеге ерли школада башлапгъы класланы муаллими болуп чалыша.
Юреги яшлагъа берилген Дина Давутованы охувлар ва оланы ата — аналары да кёп сюелер. Оьзю де ол яшланы да кёп сюеген, бай сынаву булангъы муаллим гьисапда халкъ арада танывлу.
Уясында не гёрсе, учгъанда шону этер дегенлей, Давутовланы агьлюсюнде тувгъан авлетлери де яшавда билими ва загьматы булан оьз ерин табып, ата — анадан уьлгю алып, тизив агьлюлер къургъанлар.
Уллу уланы Уллубий Волгоград шагьарда инженер — къурувчу институтну битдирип, кёп йыллар касбусуна гёре шагьарда ишлеп тургъан. Бугюнлерде агьлюсю булан Тюмень областны Нефтеюганск шагьарында яшай.
Гиччи уланы Рустам да йыракъ Темиркъазыкъ бойларда яшай ва ишлей. Къызлары Эльмира ва Абаш анасыны таъсиринден муаллимни касбусун танглагъанлар. Эльмира педагогика
университетни битдирип, анадаш школасында башлапгъы класланы муаллими болуп ишлей. Къызланы гиччиси Абашда педагогика университетни лап яхшы къыйматлар булан тамамлап, Тамазатёбе юртдагъы школада биология дарсланы юрюте.
Янгы Хаса районда гиччи юртланы бириси деп гьисаплана. Мунда гьар адам бир — бирине дос — къардаш болуп гелген. Юртлулар Пахурдинни ва Динаны агьлюсюне айрыча сый этелер. Бу агьлюде ата- бабалардан гелген асил къылыкъланы унутмай, олагъа арт бермей. Олай агьлюлер гьюрметге ва абургъа лайыкълы.
Бугюнлерде Пахурдин ва Дина авлетлеринден, оланы да авлетлеринден сююнюп, олардан илгьам алып, яшав сюрелер. 2002 — нчи йылда авлетлери, дос — къардашлары жыйылып Давутовланы «алтын тоюн» белгиледилер.
Бизде бу татывлу агьлюню сююнчюне сююнч къошулсун деп айтмагъа, авлетлерини яшларыны яхшылыкъларын гёрюп, узакъ йыллар яшамакъны ёрамагъа сюебиз.