Загьматгъа берилген агьлю

Оьр билимли Бадурдин ва абурлу Басийра очакъны отун сёндюрмей, ожакъны татывун тайдырмай яшап бажаралар. Буссагьатда да юртлулар олагъа гюнде бир керен сама бармагъа
талпыналар, неге тюгюл оланы уьюнде иссилик бар. Оьзлени авлетлеридей олар хоншу яшланы да сюйген ва юртда абур-сый къазангъан агьлю.
Озокъда, яшавда нече тюрлю къыйын шартлар бола. Бадурдинни де, Басийраны да оьмюрюнде шолай гьаллар кёп ёлукъгъан. Тек, бир-бирин сююп, бир-бирине ёл берип, кёп затлагъа гёз юмуп, яшайгъан агьлюде татывлукъ да, сююв де болдурса, олай къыйын масъалалар тез чечиле. Бадурдин ва Басийра бирге шо мердешде яшайлар.
Бадрудин Шагьболатович кёп сюеген муаллим касбусуна берилген адам. Ол оьзюню оьмюрюню аслам пайын муаллимликге багъышлагъан.
Б. Гьажимуратов 14-нчю январда 1940-нчы йыл Хамаматюртда сабанчыны агьлюсюнде тувгъан.
Ону атасы Шагьболат да оьзю яшагъан девюрде колхозланы артдырывуну актив ортакъчысы, артелни председатели болуп ишлеген. 1928-нчи йылда ол Муъминат булан уьйлене. Олагъа 6 авлет тува. Башлапгъы 3-вю гечинип, Камиля, Агьмат ва Бадурдин къала.1941-нчи йыл, Бадурдинге 1 йыл болагъанда, ол Уллу Ватан давну сыдраларына чакъырылгъан. Ону агьлюсюне Шагьболат белгисиз тас болгъан деген кагъыз гелген.
Бадурдинни атасы давгъа гетгенде, анасыны къолунда гиччи 3 яш да къалып, яшамагъа бек къыйын болгъан.
Дав йыллар, бары авур ишлер къатынланы къолунда, гиччинев яшлар, дав йыллардагъы ачлыкъ – булар барысы да яшавда бек таъсир этген. Болса да, анасы яшларын аякъгъа салмагъа, тюз тарбияламагъа бажаргъан.
1947-нчи йылда Бадурдин Хамаматюртдагъы 7-йыллыкъ школаны 1-нчи класына бара. Ону тамамлагъан сонг, 1959-нчу йыл Хасавюртдагъы педагогика училищеге охумагъа тюшген.
1962-нчи йылда, охуп турагъан кююнде, заочный бёлюгюне де чыгъып, Бадурдин Шагьболатович Хамаматюртдагъы орта школагъа пионер вожатый болуп ишлемеге чыгъа.
1965-нчи йылда ол тёбен класланы муаллими ва 5-7 класларда рус тилден дарс берип ишлеп
башлай.
Бадурдин орта билим алгъанына рази болмай, билимлерин артдырмагъа талпына ва 1986-нчы
йылда Дагъыстан Пачалыкъ Университетни филология факультетини рус бёлюгюне охума тюше.
Ону 1992-нчи йылда битдирип, рус тилни ва адабиятны муаллими болуп ишлей. Бадурдин Шагьболатович эсгерилген школада 1962-1979-нчу йылларда ишлеген. 1985- 2012-нчи йылларда буса Хамаматюртдагъы эки номерли орта школада чалышгъан.
2012-нчи йылда, школада 50 йыл ишлеген сонг, Бадурдин загьматдан айырылгъан ва лайыкълы ял алывгъа гетген.
Б. Гьажимуратов 1967-нчи йылда 7-нчи октябрде Хамаматюртлу гёзел къыз Басийра булан уьйлене.
Басийра оьз заманына гёре бек билимли тиштайпа болгъан. Ол Дагъыстан КПСС-ни Обкомундагъы Оьр Партия школаны охуп битдирген сонг, «Хамаматюрт» совхозда агроном болуп загьмат ёлун башлагъан. Ол юрт советини депутаты болуп да сайлана.
Совхозда ол бир аз ишлеген сонг, юрт советни секретары этип белгилене. Басийра оьз ишин оьтесиз ушатып ишлей. Ол къайратлы загьматы булан савлай районгъа белгили бола. Ону шолай чалышып ишлейгени гьар не якъдан да белгиленген. Басийра РФ-ны Президиумуну Председателини атындан Гьюрметлев Грамота, Бабаюрт районну Райком КПСС-ни ва райисполкому янындан кёп керенлер Гьюрметлев Грамоталар булан савгъатлангъан.
Бу агьлюде 4 авлет тарбиялангъан. Биринчи къызы Азия Ростовдагъы медицина училищени охуп битген ва хыйлы йылланы узагъында медсестра болуп чалыша. Экинчиси – Разия Избербаш шагьардагъы училищени тамамлагъан сонг, кёп заман Бабаюртда телефонистка болуп ишлеген. Уланы Салев Бабаюртдагъы райгазда слесарь болуп, гиччи уланы Садурдин Хамаматюрт юрт советинде ишлей.
Гьар авлетни аякъгъа тургъузуп, охутуп тюз ёллагъа салмагъа булагъа да, оьзгелеге йимик, тынч болмагъан. Озокъда, олай билимли ва чалышывчу ата-ананыавлетлери де билимли ва загьмат сюеген болуп чыкъды. Буссагьатгъы вакътиде оланы авлетлери яшавда оьз ерин тапгъанлар.
Бадурдинни ва Басийраны бугюнлерде яшавун ярыкъ этеген зат –авлетлерини авлетлери ва оланы да яшлары. Уллата ва уллана олардан бек къувана ва оланы яшавуна сююнч ва насип
къошула.
Бу татывлу агьлюге шу кюйде бирге яшап, къатты савлугъу да булан, 100-йыллыкъ юбилейин къаршыламакъны ёрамагъа сюебиз.