Яшав ёлун загьмат булан безеген

А.М. Темирболатов 1932-нчи йыл Бабаюртда тувгъан. Ол чагъы етишгенде юртдагъы башлапгъы школада охуп башлай. Тек огъар охувун узатма имканлыкъ болмай. Анварбек яшлыгъындан сююнюп, яш йылларын ойнап-кюлеп йибергенлерден тюгюл, ол — давну яшларыны бири. Олар нечик къыйынлыкъ гёрюп яшагъанны биз барыбыз да билебиз.

Давну акъубалары, къыйынлыкълары биринчилей яшёрюмлеге де тийген. Аталар, агъалар давгъа гетгенде, юртда къалгъан яшларда аналары, къызардашлары, агъалары булан бирче загьмат тёгюп, уьстюнлюкню гюнюне етишме кёмек этген.

Давдан сонггъу къыйынлы ач йылларда, А.Темирболатов гиччи чагъындан тутуп, колхозда ишлеме башлай. Уллулар булан бирге арпа-будай тарлавларда баш жыйып, колхозгъа тапшура. Анварбекге уьйдеги ишлени намусу да тюше, колхоз авлакъ бригадаларда да ишлей. Неге тюгюл де, ону атасы эсде ёкъдан гечине.

Атасы оьлгенни огъар нечик айтма герекни билмей, гьариси бир яшны ойлай. Шонча уллу къайгъыдан англаву ёкъ Анварбек анасына чабып гелип: «Гьали, анам, гьали» гележекмен ойнап, — деп къарап къачып гете. Амма сонг, гюнлер гетип, чагъына гёре, яш болса да, ол замансыз уллу бола, анама кёмек этме герекмен деген терен ойлагъа бата, бары да гючюн загьматгъа багъышлай…

Арадан заман гетип, колхозлар совхозлагъа айлана. А.Темирболатов да эсли улан бола. О вакътилерде ол ата юртунда юрт хозяйствону аякъгъа тургъузмакъ учун къасткъылып чалышгъан.

Анварбек Темирболатов яллыкъ билмейген, загьматгъа берилген адамланы бири болгъан десек, дурус болур. Неге тюгюл, ол юртда гьар тюрлю тармакъларда ишлеп, яхшы натижалагъа етишген. Не ерде ишлесе де, ону иш ёлдашларыны, юртлуланы арасында абуру-сыйы да болгъан.

А.Темирболатов 1968-нчи йыл «Дагъыстан» совхозда ишчи болуп 14 йыл ишлеген. Сонг Бабаюртдагъы 15 номерли ПМК-да, Промжил-стройда, 1978-нчи йыл болгъунча 8 номерли ПМК-да тракторист болуп, сонг буса столяр болуп ишлей.

Сонггъу йылларда Бабаюртдагъы 11 номерли школа-интернатда кочегар, юртдагъы май-бишлакъ заводда слесарь, «Дагъыстан» совхозда ОКЦ-де оператор болуп да загьмат тёкген.

А.Темирболатов «Уллу Уьстюнлюкню 50, 60 йыллыгъы» деген медаллагъа ва ишинде гёрсетген уьстюнлюклери саялы бир-нече керенлер акъча савгъатлагъа да ес болгъан. Анварбек Темирболатов уьлгюлю агьлю, ата ва уллата болгъан. Агьлюсю Зиярат да булан 4 улан ва 2 къызны тарбиялап оьсдюрген. «Тарбияны башы — загьмат» дегенлей, буланы авлетлери гиччиден загьматда чыныкъгъан, гьариси оьзлени юреги ушатагъан касбулагъа ес болуп чалышып, татывлу ожакълар къуруп яшайлар.

Бугюнлерде А.Темирболатов бизин арабызда ёкъ. Тек ону йимик, районну чу нечик де, савлай Дагъыстанны юрт хозяйство тармагъын аякъгъа тургъузувгъа, оьсювюне аслам къошум этген адамланы яхшы ишлери бир заманда да унутулмай, яшёрюмлеге уьлгю болуп токътажакъ.