Татывлу агьлю къуруп яшайлар

Шолай берекетли, татывлу, бирикген агьлюлер бизин районда да аз тюгюл, оланы бириси булан бугюн сизин таныш этмеге сюемен. Макъаламны игитлери, 50 йылны боюнда татывлу ожакъ къуруп яшайгъан тотаюртлу эр — къатын Сапар ва Улангерек Халиловлар.

“Алтын тойун” белгилейген Халиловланы агьлюсюнде уьч улан ва уьч къыз оьсюп тарбиялангъан.

Агьлюню башы Сапар Наврузгъалиевич 1950 — нчи йыл Тотаюртда, оьмюр ёлдашы Улангерек Агьматовна буса 1954 — нчю йыл Тамазатёбе юртда тувгъанлар. 1974 — нчю йылда эки сюйген бир болуп, татывлу ожакъ къургъан.

Сапар яшавун загьмат булан оьтгерген ёлдаш. Совхозну авлакъларында мол тюшюмлер къайтарып, комбайнер касбуну юрютген. Чалтик чачып, пачалыкъны беженин толтуруп, гьюрметлев грамоталагъа ва баракалла кагъызлагъа лайыкълы болгъан.

Олжасы Улангерек де — загьматдан бир де башын къачырмагъан асил тиштайпа. Совхозну тувар фермасында савунчу болуп ишлеген, сонггъа таба юртну авлакъларында овощлар болдургъан, помидор оьсдюрювчюлени алдынлысы болуп, огъар савгъатлар ва “Загьматны ветераны” деген медал да тапшурулгъан.

Ата — ана мелте чагъындан башлап авлетлерине загьматгъа сюювню ва абурну сингдирген. Къастлы етер муратгъа дегенлей, булай агьлюде оьсген ва тарбиялангъан яшлар тюз ёллагъа тюшген. Бугюнлерде олар оьзлерде татывлу агьлюлер къуруп, гьар — тюрлю касбулагъа ес болуп, яшавун къургъан.

Уланлары Руслан ва Нариман агьлюлери булан Тюмен областны Пыть - Ях шагьарында яшайлар. Олар темир ёл тармакъда загьмат тёгелер. Гиччи уланы Завур буса Тотаюртда яшай. Ол халкъ арада “алтын къоллары” булангъы уста деп белгили. Ол къурувчу гьисапда кёп уьйлер ва биналар тизген.

Къызланы уллусу Зульфия Тотаюртдагъы больницаны лабараториясында тазалыкъ болдура. Экинчи къызы Диляра, муаллим касбугъа ес болуп, Янгы Къара юртдагъы школада гиччи класланы муаллими болуп ишлей.

Къызланы лап да гиччиси Диана да фельдшер касбуну дипломуна ес болуп, агьлюсю булан бугюнлерде Сургут шагьарда яшай ва ишлей.

Бугюнлерде Сапар ва Улангерек Халиловлар пенсиягъа чыгъып, уьйде ял алалар. Оланы байлыгъы ва барлыгъы оьсдюрген авлетлери ва оланы яшлары. Халиловланы авлетлерини 16 яшы бар. Уллата — уллана олардан сююне ва къувана, оланы тарбиялавунда ортакъчылыкъ да этелер.

Бу йыл Халиловланы агьлюсюнде шатлы ва сююнч агьвалат болажакъ.

Ачыкъ этип айтгъанда, сентябр айда Сапар ва Улангерек татывлу ва берекетли ожакъ къуруп яшайгъанына 50 йыл тамамланажакъ.

Эр — къатын Сапар ва Улангерек Халиловлагъа авлетлери ва ювукъ адамлары булан бирге шо гюнге эсен-аман етишме Аллагь насип берсин деме сюебиз.