Яшларын тюз ёллагъа салгъан агьлю

Мусагьажи ва Нурайбат бирче татывлу ожакъ къуруп яшайгъаны 47 йыллар бола.
Мусагьажи юртда белгили тухумдан, Уллу Ватан давну ортакъчысы, Къызыл Юлдуз орденге лайыкълы болгъан Солтан Мусагьажиевични кёп яшлы агьлюсюнде тувгъан.
Мусагьажини анасы Хазиматда къонакълагъа ашын да, къашын да берип болагъан асил тиштайпа болгъан.
Мусагьажиге уллатасыны аты тагъылгъан. Ол 1949 — нчу йылда тувгъан. Гьалиден 115 йыл алда ону уллатасы Мусагьажи къаздырып, Эсги Тамазатёбе юртда булакъ сув чыгъаргъан. Юртлулар гьали де шо балгьам сувдан пайдалана. Ол мадарлы адам болгъан. Гьажгъа барып Муса деген атына гьажини къошуп эл арада Мусагьажи болгъан. Ондан тувгъан Солтан да рагьмулу, намусгъа байлангъан, чомарт, оьзден хасияты булангъы асил адам болгъан.
Булай аталардан осал улан тувмас. Мусагьажиде уллатасыны атын бирде ер этмеген. Оьзюню тенглери йимик юртлу мактапда охугъан, асгерде къуллукъ этеген. Телефон байлавлукъ станцияны ёлбашчысы, артда 50 йылланы узагъында юртдагъы участка больницада завхоз
болуп ишлеген.
Оьмюр ёлдашы Нурайбат 1954 — нчи йылда Магьачкъала шагьарны Солакъ поселогунда Гьажибатырны ва Арапатны татывлу агьлюсюнде тувгъан.
Школаны охуп битдирип, Темиркъазыкъ Осетияны Алагир деген шагьарында техникумда охугъан. Ону тамамлагъан сонг, касбусуна гёре Къарабудагьгент агъачлыкъ хозяйствода мастер
гьисапда ишлеген.
1977 — нчи йылда тамазатёбели Мусагьажи булан уьйленип, янгы ожакъ къуруп, оланы татывлу агьлюсюне гелин болуп гелген. Шо йыллардан нече сув эниш акъгъан. Яшавда ёлугъагъан тогъаслагъа чул бермей, асил мердешлеге ва адатлагъа таянып, жагьиллер агьлю яшавун къургъан.
Нурайбат гьар — тюрлю тармакъда чалышгъан. 1978 — нчи йылдан башлап юртдагъы почта байлавукъну ёлбашчысы болуп да ишлеген. 1986 - нчы йылларда райпону тюкенинде сатыв этген. Совет гьукумат бузулгъанда, адамлар кёбюсю ишсиз къалгъан.
Нурайбат замангъа гёре, бир вакътини ичинде далапчылыкъ булан машгъул болгъан, оьз башына амаллар этген.
Эр-къатын къайда ишлесе де адамлыгъын тас этмей, халкъны, элни, юртлуларыны разилигин ва баракалласын алып юрюген. Мусагьажини ва Нурайбатны агьлюсюнде 4 яш оьсген ва тарбиялангъан. Уьч къызгъа ва бир улангъа ата — ана билим алмакъ учун генг кюйде
имканлыкълар яратгъан, оланы тюз ёллагъа салып, аякъгъа тургъузгъан.
Къызланы уллусу Зульмира 1978 -нчи йылда тувгъан. Дагъыстан пачалыкъ педагогика университетни охуп битдирген. Бугюнлерде йыракъ Ханты - Мансийск шагьарда Ич ишлер къурумларда ишлей. Ол — полицияны майору.
Экинчи къызы Ирабият 1981 — нчи йылда тувгъан. Хасавюрт шагьардагъы агропромышленный коллеждни тамамлап, Ханты- Мансийск шагьарда яшлар бавунда тарбиялавчу болуп загьмат тёге. Къызланы гиччиси Испаният 1985 — нчи йылда тувгъан. Дагъыстан пачалыкъ педагогика университетде охугъан. Яшлар бавунда баш тарбиялавчу гьисапда чалыша.
Абдуллаевланы агьлюсюнде тувгъан лап да гиччи дёртюнчю авлети, атасыны аты салынгъан уланы Солтан 1988 — нчи йылда тувгъан. Магьачкъала шагьарда Правовой Академияны охуп,
юрист касбугъа ес болгъан. Бугюнлерде ол йыракъ Темиркъазыкъ бойларда, Пойково деген поселогунда ишлей.
Бугюнлерде Мусагьажи ва Нурайбат пенсиягъа чыгъып, уьйде ял алалар. Амма парахат турмайлар, гьайван, жанлар сакълайлар. Яз — яйда бавда - бахчада долана.
Яшлары йыракъ Темиркъазыкъ бойларда болсада, яйда авлетлери ва оланы да авлетлери гелип, ожакъны - абзарны шат кюлкюден толтуруп къоя.
Авлетлерини авлетлери балдан татли дегенлей, оланы 12-вюнден де Мусагьажи ва Нурайбат сююнюп тура.
Владимир Путин де февраль айда ВДНХ-да болгъан форумда агьлюню инг де аслу борчу — яшланы тарбияламакъ деп эсгерген эди.
Уланы Солтан асгерде къуллукъ этегенде, ону ата — анасыны атына нече керен баракалла кагъызлар гелген.
Уллу къызы Зульмира ишлейген къурумлардан да булай къызны тарбиялагъан саялы баракалла ва разилик билдирип кагъызлар гелгени де кёп затны англата.
Алма терекден ари тюшмей деген бизин ата — бабалар. Абдуллаевлени агьлюсюнде тувгъан яшлар ата — анадан уьлгю алып оьзлер де ким де сукъланардай татывлу ва берекетли ожакълар
къургъан. Аталардан къалгъан адатлагъа ва мердешлеге арт бермей, олагъа амин болуп яшавун къургъангъа ата - ана сююнмей болмай.
Мусагьажи ва Нурайбат халкъ булан гелишип, оланы къыйынына - тынчына табулуп, халкъ, эл арада тезден гьюрмет ва абур къазангъан.
Бу йыл Абдуллаевлени агьлюсюнде эки къатлы юбилей йыл десек де ялгъан болмас. Айтагъаным, агьлюню башы Мусагьажи Солтановичге 75 йыл, очакъны отун сёнме къоймайгъан Нурайбат Гьажибатыровнагъа 70 йыл болажакъ.
Халкъгъа яхшы якъдан белгили Абдуллаевлени агьлюсюне узакъ оьмюр, къатты савлукъ ёрап, берекетини берекети, татывлугъуну татывлугъу артсын, бирче «алтын тоюн» къаршыламагъа Аллагь насип берсин деп айтмагъа сюебиз.