Тас болуп барагъан адатларыбызны, мердешлерибизни унутма къоймай

Районну Маданият къаласында олай яшдан берли сагьнагъа чыкъмагъа, театрда ойнамагъа гьасиретлигинден муратларына етишген артистлер кёп бар. Шоланы арасындан Испаният Абакарова ва Аминат Гьажимурзаева булан газетни охувчуларын таныш этмеге сюебиз.

Сагьнаны гёзел къызы Испаният Абакарова 1965-нчи йыл Бабаюртда тувгъан. 1972-нчи йыл Бабаюртдагъы эки номерли орта школаны биринчи класына бара ва 1982-нчи йыл ону тамамлагъан сонг, Магьачкъаладагъы политехника техникумгъа охума тюше. 1985-нчи йыл ол охув ожакъны битдирип, Дагестанводстрой Управлениени лимонад цехинде загьмат ёлун башлай.

Бираз замандан сонг Испаният ата юртуна къайта ва онда ишлеп башлай, сонг Бабаюртдагъы «Элтав» деген заводда да хыйлы заман ишлеген. Бир-нече йыл ишсиз уьйде тургъан сонг, 2016-нчы йылда юрт театрында загьмат ёлун узата.

Испаният биринчи ойнагъан «Ялгъан той» деген театрында Зубаржатны ролюна гиришип къала. Тарыкъ ерде йыламсырап, герекде кюлеп бажара. Ондан сонг ол «Воллагь, тамаша», «Авур намус», «Тавлу къыз», «1000 ва 1 гече» ва шолай да кёп ролларда баш игит болуп ойнагъан. Испаниятда Аллагь берген пагьму бар. Олай болмаса, адам шо кююнде ойнап бажармай. Ол оьзюню театр сынавунда кёп тюрлю игитлени ойнап, бизин сагьнаны оьзюню гёзеллиги булан безей. Актёрлар игитни келпетине гирип бажарса, театр оьр даржада оьтгериле, ва ону багьасы актёрланы ойнавундан гьасили бола.

Испаният Абакарова маданият тармакъны оьсювю, беклешдиривю саялы Дагъыстан Республиканы ва район администрацияны янындан Гьюрметлев грамоталагъа лайыкълы болгъан.

Сюйкюмлю, исбайы Аминат Гьажимурзаева — бек пагьмулу актриса. Ол ойнайгъан театрларда адамлар эретуруп харс ура, неге тюгюл Аминат оьзюню ролларын гертилеп бажара.

А. Гьажимурзаева 1955-нчи йыл Геметёбеде тувгъан. 1963-нчю йыл ата юртундагъы школаны биринчи класына баргъан. 1972- нчи йылда ону битдирип, Магьачкъаладагъы культпросвет училищеге охума тюшген. Ону тамамлагъан сонг, Аминатны А-П. Салаватовну атындагъы къумукъ театргъа ишге алгъан. Онда бираз ишлеген сонг, Аминат ата юртуна къайта ва Маданият уьйню директору болуп ишлей. 1985-нчи йылда Аминат эрге бара ва агьлюсю булан бирче Таганрог шагьаргъа гете. Тек буланы языву нече де къысгъа болгъан, 1991-нчи йылда Аминатны эри гечине. Къолунда гиччи эки яшы да булан ят ерлерде яшама къыйын болажакъны англап, Аминат Дагъыстангъа къайта. Яшлары бираз эс тапгъанча уьйде де туруп, 2004-нчю йылда Бабаюртдагъы А. Къурбановну атындагъы халкъ театргъа ишлемеге чыгъа.

Шо гюнден берли Аминат шонда художник-постановщик болуп чалыша. Оьзюню айырылмайлы ишлейген 20-йыллыкъ загьмат ёлунда ол хыйлы спектакллерде ойнап, кёп уьстюнлюклеге етишген. Лап уллусу — къаравчуну абурун къазанып бажаргъан. Актёр учун буса о – чинк сыйлы савгъат.

Аминатны роллары тюрлю-тюрлю жанрлардан къурулгъан: пашман ерлери де, кюлкюлю ерлери де аралаш геле. Гьар ролюну ичине тюшюнюп бажарагъан Аминат, оьз пагьмусун ача ва къаравчуланы къурчун къандырагъан кюйде ойнай. Огъар милли культураны сакълавдагъы гьаракаты учун, культура министрлигини, районну башыны ва театрны администрациясыны янындан дипломлар ва Гьюрметлев грамоталар тапшурулгъан.

Театрда ойнайгъан артистлени гьарисини гьакъында бек пагьмулу деп айтмагъа болабыз. Олар оьзлени яшавун бек асил ва агьамиятлы касбугъа багъышлагъанлар. Бизин маданиятыбызны сакълап, театрлардан таба оьсюп гелеген яш наслугъа тас болуп барагъан адатларыбызны, мердешлерибизни гёрсетип, оланы тюз ёллагъа салма къаст этелер.

Биз Маданият къалада ишлейгенлени барысын да етишип гелеген байрамы — Театрны халкъара гюню булан къутлайбыз ва гележекде уьстюнлюклер, бизин маданиятыбызны дагъыдан-дагъы оьр этмекни ёрайбыз.