Оьз къыйыны булан насибин тапгъан

Барият 1946 — нчы йылда Геметёбе юртда Гьажини ва Вазипатны агьлюсюнде тувгъан 10 яшны лап да уллусу. Ону яшлыгъы къыйынлы, ач — ялангъач давдан сонггъу йыллагъа рас гелген. Кёп яшлы агьлюде тувгъан къызъяшгъа тынч болмагъан.
Барият агьлюде уллу авлети гьисапда оьзюнден гиччи уланкъардашларына ва къызардашларына аркъа таяв болгъан. Атасы сав гюн авлакъда ишлейгенге, анасы буса кёп авруйгъангъа, Барият эртеден оьзюн уллу гёрюп гьис этген. Ол гиччи чагъына да къарамайлы, оьзюне тапшурулгъан ишлени мекенли ва тындырыкълы кюйде кютген, гиччилеге де гёз къаратып оьсген.
Школада яхшы къыйматлагъа охумагъа къасткъылгъан. Агьлю шартлагъа гёре 8 класдан сонг ол охувун давам этмеге болмагъан.
Школадагъы муаллимлер билимлеге муштарлы къызъяшгъа охувун узатмакъны таклиф этсе де,
огъар шолай имканлыкълар болмагъан.
Яшлайын анасына аврув къабунуп, Барият оьзюнден гиччилерине экинчи ана болгъан десек де кёп къопдурув болмас.
1967 — нчи йыл 28 — нчи мартда Барият Оразали Салаватов деген улан булан уьйленип, Эсги Тамазатёбе юртда насипли ожакъ къургъан.
Ишде чыныкъгъан, загьматны ветераны Оразали де сав оьмюрюн «Тамазатёбе» совхозда тувар фермада ишлеп йиберген. Савлугъу осаллашгъан сонг, пенсиягъа чыгъа.
Барият да совхозда савунчу болуп загьмат тёкген. Савунчуну иши тынч болмайгъанны яхшы билебиз. О заманларда ол социалист ярышланы алдынлысы да болгъан, гьюрметлев грамоталар ва оьзге савгъатлар булан савгъатлангъан. Совхозну ёлбашчылары не ерге йиберсе де, не ишни тапшурса да, Барият оьзюню борчларына жаваплы янашып, бирев де сёз айтып болмайгъан кюйде оланы яшавгъа чыгъаргъан.
Совхозну гьар — тюрлю тармагъында ишлеген Барият бугюнлерде тийишли ял алывда.
Талашгъан талай табар деп бизин ата-бабалар негьакъ айтмагъан. Барият да оьз загьматы ва къыйыны булан яшавун талайлы къургъан.
Агьлю чери Оразали булан 5 авлетни оьсдюрген. Бугюнлерде уланлары Мурат, Абдуллатип, Абдулвагьит ва къызлары Алжанат ва Гюлнара гьар — тюрлю касбулагъа ес болуп, татывлу агьлюлер де къуруп, авлетлерин оьсдюрелер.
Яшавда шатлыкъ булан къайгъы да янаша геле. Бариятны аркъа таяву болуп гелген кёп сюеген яшав ёлдашы Оразали бу дюньядан гетгенли 10 йыллар бола. Яшлайын уланыны уланы Нариман хатабалагьдан гечинип, Бариятны юрегине бир де къолай болмайгъан яра салынды.
Яратгъаным яшавда ёлугъагъан тогъаслагъа къаршы турмагъа оьзю гюч де, саламатлыкъ - сабурлукъ да бере.
Бариятны янында ананы, къайынананы ва уллананы сююв ва абур булан къуршап алгъан уланы Абдуллатип, гелини Жамиля ва оланы яшлары бар. Рагьат туруп уьйренмеген Барият да олагъа къолундан гелеген кёмегин эте.
Совет девюрлерден берли ол бир намазында йибермеген. Бугюнлерде де гьар намазындан сонг дюньяда тувулунгъан гьалланы гёз алгъа тутуп, дюньягъа парахатлыкъ, адамланы арасында татывлукъ, дослукъ, адиллик тилей.
Эсги Тамазатёбе уллу юрт тюгюл. Бариятгъа ол тезден экинчи ата юрту болуп токътагъан. Юртлуланы арасында герти гьюрметге ва сыйгъа лайыкълы болгъан Барият, айлана ягъын къуршап алгъан авлетлеринден, оланы да авлетлеринден ва бары да халкъдан сююнюп, иштагьланып яшай.
Оьз къыйыны булан яшамакъ — рагьмуну баш булагъы деп айтыла гелген. Оьз къыйыны булан яшавда касбусун, талайын тапгъан Барият Салаватовагъа гележекде шатлы ва сююнч гюнлеригиз кёп болсун деп айтып, огъар ювукъ адамларыны тёрюнде къатты савлукъ ва узакъ оьмюр ёрайбыз.