Пагьмулу Зайырбек булан Зайнап
Дюньяда пагьмулу адамлар кёп бар. Оланы гьарисини оьз ёлу къайсы буса да бир тармакъда аян бола, бирлери буса пагьмусун чыгъармагъа уялып, яшавун йибере. Амма тувгъандан
берилген пагьмуну яшырма болмай. Айрокъда йырлама бажарагъанлар, жагьил заманындан
тутуп белгили болуп башлай.
Бугюн мен сизин бек пагьмулу йыравлар уланкъардаш-къызардаш булан таныш этмеге сюемен. Олар яш заманындан берли йырлап, Дагъыстандан тышда да белгили болгъан Зайнап ва Зайырбек Магьатовлар.
Оланы ата ожагъында 5 улан ва 1 къыз оьсген. Анасы жагьил заманындан берли къомуз сокъма уста болгъангъа буса ярай, авлетлери барысы да яш заманында гитара согъуп йырлагъанлар. Зайнап да, Зайырбек де бирче бек пагьмулу, адамны къурчун къандырагъан кюйде йырлайгъанны уллу да, яш да биле.
Зайырбек чагъына етишгенде уьйлене, Зайнап да эрге чыгъа. Тек олар оьз пагьмусун сёндюрюп къоймай, ону оьсдюре, артдыра. Къысматны буйругъуна гёре Зайнап музыкант улан Шагьсолтангъа эрге чыгъа. Булар уьчюсюде ансамбль болуп йырлама башлайлар, тюрлю-тюрлю конкурсларда ортакъчылыкъ этелер ва гьар заманда да биринчиликге ес болалар.
Бугюнлерде оьзюню инче асил тавушу булангъы Зайнап ва йырны маънасын гьар тынглавчугъа етишдирип бажарагъан Зайырбек, олай да оланы гьар йырына тюзевлю макъам сайлап бажарагъан Шагьсолтан кёп адамны абурун ва сюювюн къазанмагъа бажаргъанлар.
Айрокъда, олар «Амалым-къызардашым» деген йырын йырлайгъанда, уллу да, гиччи де тымыйып тынглайлар. Бу йыр агьлюдеги яшланы гиччиден тутуп бир-бирине бавурлу болмагъа уьйрете.
Олай арив маъналы йырлары оланы кёп бар. Зайырбекни ва Зайнапны концертине гелсенг,
бир арив ял алып гетесен. Шолай пагьмулу агьлюде тувуп оьсген уланкъардаш ва къызардаш оьзлени атларын оьрлюклерде айтдырып бажардылар.
Бизин районда шолай пагьмулу агьлюлер баргъа биз бек шатбыз.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
